जनकपुर। भारतबाट फर्किदै गर्दा नेपाल भारत सीमा जटही नाकामा मृत्यु भएका धनुषाका वीरेन्द्र गुरमैताकी श्रीमतीलाई धनुषाको शहीदनगर नगरपालिकामै जागिर दिने घोषणा गरेको छ।
भारत बाट फर्किदै गर्दा नाकामै मृत्यु भएपछि राहत स्वरुप उनकी श्रीमतीलाई नगरपालिकामै जागिर दिने घोषणा गरिएको हो। नगर प्रमुख उदय कुमार बरबरिया (यादव)ले मृतक गुरमैताका परिवारलाई राहत स्वरुप १ लाख रुपैयाँ घोषणा गरे बमोजिम बिहीवार नगर प्रमुख उदय कुमार बरबरिया (यादव) र निवर्तमान प्रमुख प्रशासकीय अधिकृत धिरेन्द्र लाल कर्णले संयुक्त रुपमा मृतकका परिवारलाई सो चेक हस्तान्तरण गरेका हुन्।नगरपालिकाकै तर्फबाट मृतक गुरमैताको बालबच्चाहरुलाई उच्च शिक्षासम्म निःशूल्क शिक्षासहित उनकी श्रीमतीलाई जागिरको निर्णय गरिएको बताइएको छ।
‘स्वर्गीय गुरमैताले आफ्नो परिवारको लागि ज्यान दिए। हामीले उनको परिवारलाई क्षतिपूर्ति कहिले पनि दिन सक्दैनौं, अपूर्णीय क्षति भएको छ। तर, राहत स्वरुप १ लाख रुपैयाँ र उनको बालबच्चालाई यदुकूहाकै गुरुकुल शिक्षा निकेतन आवासीय विद्यालयमा कक्षा १२ सम्म पूर्ण निःशूल्क पढाउनुको साथै उनकी श्रीमतिलाई आर्थिक कमजोरीका कारण हातमुख जोड्न गाह्रो नहोस् भनी जागिरको व्यवस्था गरिदिएको छु,’ मेयर बरबरियाले भने।
उनको दुई छोराछोरी छन्। उनीहरुको लत्ताकपडा, शिक्षा सबै निःशूल्कसहित उनकी श्रीमतीलाई जागिर दिने निर्णय गरिएको हो। मेयर बरबरियाका अनुसार शुक्रवार बस्ने कार्यपालिकाको बैठकबाट उनलाई नियुक्तिको लागि सिफारिस सहित पत्र पठाइने छ।
Discussion about this post