वर्षायाममा घरलाई पूर्ण ताजा राख्न लगाउनुहाेस् यी ‘इन्डोर प्लान्ट’

काठमाडौं/भदौ ३१ गते। वर्षायामले गर्मीबाट राहत दिलाए पनि घरभित्र ओसिलोपन र दुर्गन्धजस्ता समस्या निम्त्याउने गर्छ।

हावामा हुने चिस्यानका कारण कोठा, दराज, ओछ्यान र भित्ताहरूमा ओस जम्मा हुन्छ। यसले गर्दा घरभित्र गुम्सिएको वा नराम्रो गन्ध आउन थाल्छ। समयमै यसको समाधान गरिएन भने घरको वातावरण बिग्रनुका साथै स्वास्थ्यमा समेत प्रतिकूल असर पर्न सक्छ। यस्तो अवस्थामा केही विशेष प्रकारका बिरुवा (इन्डोर प्लान्ट) को प्रयोग गरी घरलाई ताजा र स्वच्छ राख्न सकिन्छ।

वर्षाको समयमा हावा अत्यधिक आर्द्र हुने भएकाले कोठामा ओसिलोपन र दुर्गन्ध बढ्छ। यो समस्या समाधानका लागि पिस लिली, स्नेक प्लान्ट, स्पाइडर प्लान्ट र बोस्टन फर्न उत्कृष्ट विकल्प हुन्। यी बिरुवाले हावाबाट ओसिलोपन सोसेर घरभित्र ढुसी बढ्न दिँदैनन् र प्राकृतिक रूपमा हावा शुद्ध बनाउँछन्।

पिस लिली

यो बिरुवा ओसिलोपन वा आर्द्रता सोस्न निकै प्रभावकारी हुन्छ। यसले दुर्गन्ध र हानिकारक तत्त्वहरूलाई छानेर हावा ताजा बनाउँछ। सन् १९८९ मा नासाले गरेको एक अध्ययनअनुसार पिस लिली विश्वका उत्कृष्ट वायु शुद्धीकरण गर्ने ‘इन्डोर प्लान्ट’ मध्ये एक मानिन्छ। यसले घरभित्रको स्थिर हावामा पाइने बेन्जिन, फर्मल्डिहाइड र कार्बन मोनोअक्साइडजस्ता अत्यन्त विषाक्त पदार्थ सोस्छ। बदलामा प्रशस्त अक्सिजन छाड्ने भएकाले घरको हरेक कुनाको हावा स्वच्छ रहन्छ।

स्नेक प्लान्ट

स्नेक प्लान्ट घरका लागि उपयुक्त अर्को उत्कृष्ट बिरुवा हो। यसले हावा शुद्ध पार्नुका साथै राति पनि अक्सिजन उत्सर्जन गर्छ। यसको हेरचाह र मर्मतसम्भारमा धेरै समय दिनु पर्दैन। यसले ओसिलो ठाउँमा फस्टाउने ब्याक्टेरिया नष्ट गर्न मद्दत पुर्‍याउँछ, जसले गर्दा कोठाको बासी हावा सफा हुन्छ।

स्पाइडर प्लान्ट

नासाद्वारा प्रमाणित यो ‘एयर प्युरिफायर’ ले हावाबाट विषाक्त ग्यास र अप्रिय गन्ध सोस्छ। स्पाइडर प्लान्ट कम हेरचाहमा पनि सजिलै हुर्कने लोकप्रिय बिरुवा हो। यसले भित्री हावा शुद्ध गर्नुका साथै तनाव कम गर्न र वास्तु सिद्धान्तअनुसार घरमा सकारात्मक ऊर्जा ल्याउन मद्दत गर्छ।

बोस्टन फर्न

यो बिरुवा ओसिलो वा आर्द्र वातावरणमा राम्रोसँग फस्टाउँछ। यसले प्राकृतिक ‘ह्युमिडिफायर’ (आर्द्रता सन्तुलन गर्ने उपकरण) को रूपमा काम गर्ने भएकाले बाथरुम वा ओसिलो हुने सम्भावना भएका कोठाका लागि निकै उपयोगी मानिन्छ।