जनकपुरधाम/भदौ २३ गते । बाढीबाट प्रभावित परिवारलाई राहत उपलब्ध गराउने उद्देश्यले जनकपुरधाम उद्योग वाणिज्य संघले संकलन गरेको राहत सामग्री सार्वजनिक गरेको छ। संघले मधेस प्रदेशका मुख्यमन्त्री कृष्णप्रसाद यादवको उपस्थितिमा राहत सामग्री सार्वजनिक गरेको हो।
बाढी प्रभावित परिवारलाई तत्काल आवश्यक पर्ने खाद्यान्न, कपडा, जुत्ताचप्पल, भाँडाकुँडा तथा दैनिक उपभोग्य सामग्रीलाई प्राथमिकतामा राखेर राहत संकलन गरिएको संघले जनाएको छ।
संघका अनुसार राहत सामग्रीअन्तर्गत ७५ बोरा चामल, २१ बोरा सोयाबिन, दाल, नुन, चिउरा, मुरही, चाउचाउलगायत खाद्य सामग्री संकलन गरिएको छ। त्यस्तै, विभिन्न प्रकारका लत्ताकपडा, जुत्ताचप्पल, कम्बल, बेडसिट, टावेल तथा बालबालिकाका कपडासमेत संकलन गरिएको छ।
बाढीका कारण घरायसी सामग्री गुमाएका परिवारलाई लक्षित गर्दै संघले भान्सामा आवश्यक पर्ने सामग्रीसमेत पर्याप्त मात्रामा संकलन गरेको छ। जसमा ७५ थान तावा, ७५ थान कराही, २०० थान थाली, २०० थान कचौरा र २०० थान गिलास रहेका छन्। राहत सामग्रीमा एक थान सिलाइ मेसिनसमेत समावेश गरिएको छ।
विपद्को समयमा प्रभावित परिवारलाई तत्काल राहत पु¥याउने उद्देश्यले व्यवसायी, सहयोगी तथा विभिन्न संघसंस्थाको सहकार्यमा राहत सामग्री संकलन गरिएको राहत संकलन समितिका संयोजक जितेन्द्र महासेठले बताए।
उनका अनुसार राहत सामग्री संकलन अभियान पीडित परिवारसम्म राहत नपुग्दासम्म निरन्तर सञ्चालन गरिनेछ। हालसम्म संकलन भएका सामग्री लिएर बुधबार बाढी प्रभावित क्षेत्रमा पुग्ने तयारी गरिएको महासेठले जानकारी दिए।
राहत सामग्री सार्वजनिक कार्यक्रममा मधेस प्रदेशसभा सदस्य दीपेन्द्र ठाकुर, जनकपुरधाम उपमहानगरपालिकाका नगरप्रमुख मनोजकुमार साह, पूर्व प्रदेशसभा सदस्य परमेश्वर साह, जनकपुरधामका पूर्व नगरप्रमुख लालकिशोर साह, जनकपुरधाम उद्योग वाणिज्य संघका अध्यक्ष जितेन्द्र महासेठ तथा नेपाल पत्रकार महासंघ धनुषाका अध्यक्ष पुरन साहलगायतको उपस्थिति थियो।
बाढीबाट प्रभावित परिवारलाई राहत उपलब्ध गराउन संघले थालेको अभियानले विपद्को समयमा निजी क्षेत्र र व्यवसायी समुदायको सामाजिक उत्तरदायित्वलाई समेत उजागर गरेको छ।
Discussion about this post