जनकपुरधाम/भदौ २२ गते । त्रिशूली तथा भोटेकोशी नदीमा आएको बाढीबाट प्रभावित परिवारको सहयोगका लागि जनकपुरधाम सुनचाँदी व्यवसायी संघले राहत रकम तथा सामग्री हस्तान्तरण गरेको छ।
संघले सुनचाँदी व्यवसायीहरूबाट संकलन गरेको ३ लाख १ हजार रुपैयाँ नेपाल सुनचाँदी रत्न तथा आभूषण महासंघ, मधेसका अध्यक्ष पवन ठाकुरलाई हस्तान्तरण गरेको हो।
त्यसैगरी संघले २ सय १ थान ट्र्याकसुट जनकपुरधाम उद्योग वाणिज्य संघलाई र ५१ थान कुकर बाढीपीडितका लागि सञ्चालन भइरहेको सहजीकरण अभियानका संयोजक अम्बुप्रसाद साहलाई प्रदान गरेको संघका अध्यक्ष राजीव साह चन्दनले जानकारी दिए।
राहत हस्तान्तरण गर्दै अध्यक्ष चन्दनले बाढी तथा विपद्का कारण व्यवसायसमेत प्रभावित भएर ठप्पजस्तै रहेको अवस्थामा पनि पीडित परिवारको दुःखमा साथ दिन व्यवसायीहरूले आफ्नो क्षमताअनुसार सहयोग जुटाएको बताए।
उनले तत्कालीन राहतसँगै बाढी प्रभावित क्षेत्रमा पुनःस्थापना र पुनर्निर्माणको काम पनि उत्तिकै महत्वपूर्ण रहेको उल्लेख गर्दै आगामी दिनमा त्यसका लागि समेत संघले आवश्यक सहयोग गर्ने प्रतिबद्धता व्यक्त गरे।
बाढीका कारण ठूलो जनधनको क्षति भएको अवस्थामा पीडितलाई सहयोग गर्नु सामाजिक दायित्व भएको भन्दै संघले आवश्यकताअनुसार राहत तथा सहयोगका कार्यक्रमलाई निरन्तरता दिने जनाएको छ।
Discussion about this post