मोरङ कारागारमा कैदीबन्दीको प्रदर्शन, सिडिओ र एसपीविरुद्ध नाराबाजी

काठमाडौं/भदौ १५ गते। जिल्ला कारागार मोरङका कैदीबन्दीहरूले जिल्ला प्रशासन कार्यालय मोरङका प्रमुख जिल्ला अधिकारी (सिडिओ) र जिल्ला प्रहरी प्रमुख (एसपी) विरुद्ध नाराबाजी गर्दै प्रदर्शन गरेका छन्।

आइतबार राति कारागार परिसरभित्रै उत्रिएका कैदीबन्दीहरूले लागूऔषध कारोबारको झुटा आरोप लगाई मानसिक दबाब दिने गरेको, रकम असुलीको प्रयास गरेको र गोली हान्ने धम्की दिने गरेको गम्भीर आरोप लगाएका छन्।

कारागारभित्र हतियारसहित प्रहरी परिचालन गरिएकोमा आपत्ति जनाउँदै उनीहरूले प्रधानमन्त्री बालेन शाह र गृहमन्त्री सुधन गुरुङको ध्यानाकर्षण गराएका हुन्। सो क्रममा कैदीबन्दीहरूले प्रधानमन्त्री शाह र गृहमन्त्री गुरुङको पक्षमा भने नाराबाजी गरेका थिए।

कारागारभित्र शंकास्पद गतिविधि भइरहेको बुझ्न प्रहरी टोली प्रवेश गर्न खोजेपछि स्थिति झनै तनावग्रस्त बनेको थियो। लगत्तै कैदीबन्दीहरूले मोरङका प्रहरी प्रमुखविरुद्ध पनि कडा नाराबाजी गरेका थिए।

सामान्यतया कारागारभित्र नियमित रूपमा प्रहरी प्रवेश गर्न पाउने व्यवस्था छैन। यद्यपि, कुनै शंकास्पद वा गैरकानुनी गतिविधि भएको आशंका लागेमा जिल्ला प्रशासन कार्यालयबाट अनुमति लिएर प्रहरीले खोजी कार्य (सर्च) गर्न सक्ने कानुनी प्रावधान रहेको छ।