साउन ४ गते। रक्त व्यवस्थापन तथा स्वैच्छिक रक्तदान प्रवर्द्धनमा सक्रिय संस्था ब्लड फर नेपाल (Blood For Nepal) ले आफ्नो आठौँ वार्षिकोत्सव विविध कार्यक्रमका साथ मनाउने भएको छ। सन् २०१८ देखि स्वयंसेवी अभियानका रूपमा सुरु भएको संस्थाले हालसम्म २६ हजार ६५६ रक्त व्यवस्थापनका केसहरूमा सहजीकरण गर्दै हजारौँ बिरामीलाई आशा र सहयोग प्रदान गरेको जनाएको छ भने ७ हजार ६३४ युनिट विभिन्न समयमा रक्तसँचार केन्द्रलाई रक्तदान कार्यक्रम गरि हस्ताक्षरण गरेका छन्।
वार्षिकोत्सवको अवसरमा संस्थाले “८ वर्ष, ८ कार्यक्रम” अभियान सञ्चालन गर्दै देशका सातै प्रदेश र काठमाडौं उपत्यकामा एकै दिन रक्तदान तथा रक्तदान सचेतना कार्यक्रम मध्ये एक कार्यक्रम आयोजना गर्ने योजना सार्वजनिक गरेको छ। अभियानको मुख्य उद्देश्य नियमित स्वैच्छिक रक्तदानको संस्कृति विकास गर्नु, रक्त व्यवस्थापनमा जनचेतना अभिवृद्धि गर्नु तथा युवाहरूलाई मानवतामूलक सेवामा जोड्नु रहेको संस्थाले जनाएको छ।
ब्लड फर नेपालका सचिव “भवानी प्रसाद साह” ले आठ वर्षको यात्रामा साथ दिने सम्पूर्ण रक्तदाता, स्वयंसेवक, साझेदार संस्था, स्वास्थ्यकर्मी तथा शुभेच्छुकहरूप्रति आभार व्यक्त गर्दै आगामी दिनमा पनि रक्त अभावका कारण कसैले जीवन गुमाउन नपरोस् भन्ने लक्ष्यका साथ अभियानलाई अझ प्रभावकारी बनाइने बताए।
संस्थाले वार्षिकोत्सवको अवसरमा सदस्यता विस्तार, रक्तदान सचेतना, स्वयंसेवक परिचालन, साझेदारी विस्तार तथा समुदायस्तरमा रक्त व्यवस्थापनसम्बन्धी अभियानलाई समेत प्राथमिकताका साथ अघि बढाउने जनाएको छ।
ब्लड फर नेपालले नियमित रक्तदान, सदस्यता, स्वयंसेवा तथा आर्थिक सहयोगमार्फत अभियानमा सहभागी हुन सबैलाई आह्वान गरेको छ। संस्थाले सामान्य, आजीवन, एसोसिएट तथा मानार्थ गरी चार प्रकारका सदस्यता व्यवस्था गरेको छ, जसबाट रक्त व्यवस्थापन तथा सामाजिक सेवामा सहभागी हुने अवसर प्रदान गरिएको छ।
“रक्तदान जीवनदान हो, रगत व्यवस्थापन साझा जिम्मेवारी हो” भन्ने सन्देशका साथ ब्लड फर नेपालले आगामी वर्षहरूमा पनि मानवताका लागि आफ्नो अभियानलाई निरन्तरता दिने प्रतिबद्धता व्यक्त गरेको छ।
Discussion about this post