व्याहुत सुडी सेवा समिति जनकपुरधामको महाधिवेशन सम्पन्न

धनुषा/असार ६ गते । व्याहुत सुडी सेवा समिति जनकपुरधामको महाधिवेशन सम्पन्न भएको छ। समितिका अध्यक्ष चन्देश्वर प्रसाद साहको अध्यक्षतामा सम्पन्न महाधिवेशनमा संस्थाको सांगठनिक अवस्था, आर्थिक प्रतिवेदन तथा आगामी कार्यदिशाबारे विस्तृत छलफल गरिएको थियो।

महाधिवेशनमा महासचिव लक्ष्मणप्रसाद साहले सांगठनिक प्रतिवेदन प्रस्तुत गर्दै संस्थाले विगतमा सञ्चालन गरेका सामाजिक, शैक्षिक तथा सामुदायिक गतिविधिबारे जानकारी गराएका थिए। उनले समाजमा एकता कायम राख्ने, संस्थालाई थप सुदृढ बनाउने तथा युवा पुस्ताको सहभागिता वृद्धि गर्ने उद्देश्यले विभिन्न कार्यक्रम सञ्चालन गरिएको बताए।

त्यसैगरी कोषाध्यक्षले संस्थाको आय–व्यय विवरण प्रस्तुत गर्दै आर्थिक पारदर्शिता, जवाफदेहिता र सुशासनप्रति समिति प्रतिबद्ध रहेको उल्लेख गरे।

महाधिवेशनको उद्घाटन सत्रका प्रमुख अतिथि व्याहुत सुडी समाजका वरिष्ठ सदस्य जगदेव साहले समाजको समग्र विकासका लागि सबै सदस्यबीच सहकार्य र एकता आवश्यक रहेको बताए। उनले शिक्षा, सामाजिक सद्भाव तथा युवाहरूको नेतृत्व विकासलाई प्राथमिकतामा राखेर अघि बढ्नुपर्ने धारणा व्यक्त गरे।

कार्यक्रममा भोला प्रसाद साह, उमाशंकर प्रसाद साह, रामपल्टन साह, अमरनाथ गुप्ता, श्यामप्रसाद गुप्ता लगायत समाजका अगुवा व्यक्तित्वहरूको सहभागिता रहेको थियो। वक्ताहरूले व्याहुत सुडी समाजको सामाजिक तथा सांस्कृतिक पहिचान संरक्षण गर्दै समाजसेवामूलक गतिविधिलाई अझ प्रभावकारी बनाउनुपर्नेमा जोड दिएका थिए।

महाधिवेशनले संस्थाको हालसम्मको प्रगतिको समीक्षा गर्दै आगामी कार्यकालमा समाजको हित, समुदायको उत्थान तथा संस्थागत सुदृढीकरणका लागि विभिन्न योजना र कार्यक्रमहरू कार्यान्वयन गर्ने प्रतिबद्धता व्यक्त गरेको छ। सहभागीहरूले समाजलाई थप संगठित, सक्रिय र प्रभावकारी बनाउन सबै सदस्यको साझा प्रयास आवश्यक रहेको बताएका छन्।