चिल्ड्रेन होलि प्लेस हाई स्कुलमा तालाबन्दी,६५० भन्दा बढी विद्यार्थीको पढाइ प्रभावित

धनुषा/जेठ २० गते। चिल्ड्रेन होलि प्लेस हाई स्कुलमा ताल्चा लगाएपछि ६५० भन्दा बढी विद्यार्थीको पठनपाठन प्रभावित भएको भन्दै विद्यालय प्रशासनले हस्तक्षेपका लागि प्रशासनसमक्ष गुहार गरेको छ ।

जनकपुरधाम उपमहानगरपालिका–८ स्थित गुठी संस्थानअन्तर्गत रसिक निवासको जग्गामा सञ्चालन हुँदै आएको विद्यालयका सञ्चालक अजयकुमार यादवले विद्यालयको सुरक्षा, ताल्चा खुलाउने व्यवस्था तथा संलग्नमाथि कानुनी कारबाहीको माग गरेका हुन् । विद्यालय पक्षका अनुसार उक्त विद्यालय विगत १७ वर्षदेखि सञ्चालनमा रहेको छ । हाल करिब ६५० विद्यार्थी अध्ययनरत रहेको र विद्यालय भवन, भौतिक पूर्वाधार तथा शैक्षिक वातावरण निर्माणमा तीन करोड रुपैयाँभन्दा बढी लगानी गरिएको दाबी गरिएको छ ।

सञ्चालक यादवले रसिक निवास गुठीका संरक्षक अवधेश पोखरेलसँग करार गरी विद्यालय सञ्चालन गर्दै आएको बताए । उनका अनुसार धरौटीस्वरूप २२ लाख रुपैयाँ बुझाइएको थियो भने मासिक ५० हजार रुपैयाँ भाडासमेत तिर्दै आएको छ । तर, पोखरेलले कुनै आधिकारिक अधिकारपत्र वा कानुनी सम्झौता प्रस्तुत नगरी विद्यालयमाथि दबाब सिर्जना गरेको आरोप विद्यालय प्रशासनको छ । विद्यालय पक्षले गुठीको जग्गा बिक्री गर्ने प्रस्ताव अस्वीकार गरेपछि अनाधिकृत रूपमा कब्जा गर्ने प्रयास भएको दाबी गरेको छ ।

विद्यालयमा ताल्चा लगाएपछि कम्प्युटर, फर्निचर, जेनेरेटर, विद्यालय बस, पुस्तकालय सामग्री, आर्थिक अभिलेख तथा महत्वपूर्ण कागजातको सुरक्षामाथि समेत चिन्ता बढेको सञ्चालक यादवले बताएका छन् । घटनापछि अभिभावक र विद्यार्थीमा अन्योल बढेको छ भने विद्यालय प्रशासनले तत्काल समस्या समाधान गरी शैक्षिक वातावरण पुनःस्थापित गर्न प्रशासनसँग माग गरेको छ ।