धनुषा/जेठ १ गते । जनकपुरधामको गंगासागर पोखरी आसपास क्षेत्रबाट हटाइएका फुटपाथ व्यवसायीहरूको व्यवस्थापनका लागि मिना बजार सञ्चालनमा ल्याइएको छ । जनकपुर कपडा तथा रेडिमेड व्यवसायी महासंघको अगुवाइमा विस्थापित व्यवसायीलाई वैकल्पिक व्यापारिक स्थान उपलब्ध गराउने उद्देश्यले बजार सञ्चालन गरिएको हो ।
बजार उद्घाटन कार्यक्रममा प्रतिनिधिसभा सदस्य मनिष झा ले फुटपाथ व्यवसायीहरूको व्यवस्थापनका लागि गरिएको पहल सकारात्मक र स्वागतयोग्य रहेको बताए । उनले देशभर फुटपाथमा व्यवसाय गर्नेहरूको संख्या ठूलो रहेकाले त्यस्ता व्यवसायीहरूको तथ्यांक संकलन आवश्यक रहेको धारणा राखे ।
महासंघका अनुसार मिना बजारमा १०० भन्दा बढी फुटपाथ व्यवसायीलाई व्यवस्थापन गर्ने तयारी गरिएको छ । व्यवसाय सञ्चालनलाई सुरक्षित र व्यवस्थित बनाउन सुरक्षागार्डको व्यवस्था गर्नुका साथै सिसी क्यामेरा जडान गरिने जनाइएको छ ।
जनकपुरधाम उपमहानगरपालिकाले पनि फुटपाथ व्यवसायी व्यवस्थापनको प्रक्रिया अघि बढाइरहेको जनाएको छ । सरकारी प्रक्रिया पूरा हुन समय लाग्ने देखिएपछि तत्काल राहतस्वरूप निजी स्तरबाट बजार सञ्चालनको पहल गरिएको महासंघले जनाएको छ ।
महासंघका पदाधिकारीहरूले फुटपाथ व्यवसायीलाई व्यवस्थित बजारभित्र ल्याएर व्यवसाय सञ्चालन गराउन सके शहरको सौन्दर्य कायम हुनुका साथै साना व्यवसायीको जीविकोपार्जनमा समेत टेवा पुग्ने विश्वास व्यक्त गरेका छन् ।
Discussion about this post