मधेश प्रदेशमा शिक्षा र स्वास्थ्य पूर्वाधार सुदृढीकरणका दुई परियोजना चीनको सहयोगमा हस्तान्तरण

जनकपुरधाम/जेठ २० गते। मधेश प्रदेशमा शिक्षा र स्वास्थ्य सेवा सुदृढीकरणका लागि चिनियाँ सहयोगमा सञ्चालन गरिएका दुई महत्वपूर्ण परियोजनाहरू औपचारिक रूपमा हस्तान्तरण गरिएको छ। “भविष्य उज्यालो बनाउने” शिक्षा परियोजना र “आरामदायी सुत्केरी अभियान” स्वास्थ्य परियोजना चीन ग्रामीण विकास प्रतिष्ठान (CFPA) ले नेपालस्थित चिनियाँ दूतावासको आर्थिक सहयोगमा र ग्लोबल पिस फाउन्डेसन (GPF) को साझेदारीमा सञ्चालन गरेको हो।

शिक्षा परियोजनाअन्तर्गत दुई सामुदायिक विद्यालयमा डेस्क-बेञ्च, स्मार्ट बोर्ड, ह्वाइटबोर्ड, स्टेशनरी सामग्री तथा ६०२ सेट विद्यार्थी पोशाक वितरण गरिएको छ। स्वास्थ्य परियोजनाअन्तर्गत मधेश प्रादेशिक अस्पतालको सुत्केरी कक्षमा वातानुकूलन प्रणाली (AC) जडान गरिँदैछ, जसले आमाहरूलाई सुरक्षित र सुविधा सम्पन्न सेवा प्रदान गर्ने अपेक्षा गरिएको छ।

शिक्षा परियोजनाको हस्तान्तरण कार्यक्रममा प्रमुख अतिथिको रूपमा पूर्व उपप्रधानमन्त्री ईश्वर पोखरेलको उपस्थिति रहेको थियो। स्वास्थ्य परियोजनाको उद्घाटन मधेश प्रदेशसभाका सभामुख माननीय रामचन्द्र मण्डलले गर्नुभयो।

उक्त कार्यक्रममा चिनियाँ दूतावासका व्यापार परामर्शदाता सिए यु, CFPA नेपालकी निर्देशक सु जोउ, मधेश प्रदेशकी शिक्षा मन्त्री रानी तिवारी, स्वास्थ्य मन्त्री सत्रुधन सिंह, मधेसी आयोगका संस्थापक प्रमुख आयुक्त डा. विजयकुमार दत्त, योजना आयोगका उपाध्यक्ष डा. सोहन साह, प्रदेश सांसदहरू, जनकपुरधामका नगर प्रमुख तथा विभिन्न स्थानीय र प्रादेशिक अधिकारीहरूको उपस्थिति थियो।

परियोजनाका प्रबन्धकहरू शिवाङ्ग दत्त, सन्ध्या बज्राचार्य र जिबेश गुरुङ रहेका छन्। कार्यक्रममा बोल्दै CFPA नेपाल कार्यालयकी निर्देशक सु जोउ झीच्याङले यस्ता परियोजनाले ग्रामीण क्षेत्रहरूमा गुणस्तरीय शिक्षा, स्वास्थ्य सेवा र सुरक्षित खानेपानीको पहुँचमा उल्लेखनीय योगदान पुर्‍याउने बताइन्। उनले मधेश प्रदेशप्रति चिनियाँ जनताको विशेष संवेदनशीलता रहेको उल्लेख गर्दै यस्ता सहयोगले नेपाल–चीन सम्बन्ध अझ मजबुत हुने विश्वास व्यक्त गरिन्।

सन् २०१६ देखि २०२५ सम्म CFPA ले “लभ प्याकेज” र “वार्म प्याकेज” मार्फत ३० हजारभन्दा बढी विद्यार्थीलाई सहयोग प्रदान गरिसकेको छ। २०२४ मा GPF र CFPA को सहकार्यमा २५ विद्यालयका १८,००० विद्यार्थी र ९,००० महामारी प्रभावित परिवारलाई जीविकोपार्जन सहयोग पनि गरिएको थियो। यस्तै, २०१८ को चक्रवात, २०२४ को आगलागी र कोभिड महामारीको समयमा चीनबाट आपतकालीन राहत, आइसोलेसन केन्द्र, सरसफाइ तथा अक्सिजन स्टेसन निर्माणमा पनि महत्त्वपूर्ण सहयोग प्राप्त भएको थियो।

नेपाल–चीन कूटनीतिक सम्बन्धको ७०औं वार्षिकोत्सवको अवसरमा आयोजित यस कार्यक्रमले दुई देशबीचको मित्रता र दीर्घकालीन सहकार्यको सन्देश दिएको सहभागी वक्ताहरूले बताएका छन्। उनीहरूले भविष्यमा अझ प्रभावकारी र दीगो साझेदारीको अपेक्षा पनि व्यक्त गरेका छन्। सहभागी वक्ताहरूले भविष्यमा यस्ता दीर्घकालीन र जनमुखी परियोजनाहरू निरन्तरता पाउनेमा विश्वास व्यक्त गरे।