असार ५ गते। महोत्तरीको मटिहानी नगरपालिकाले ४० करोड ३९ लाखभन्दा बढीको बजेट ल्याएको छ । बुधवार नगरपालिकाको ११ औँ नगरसभामा नगरप्रमुख हरिप्रसाद मण्डलले अगामी आर्थिक वर्ष २०८०/०८१ का लागि ४० करोड ३९ लाख ८ हजार १ सय रुपैयाँको बजेट प्रस्तुत गर्नुभएको हो । उहाँले वडा समितिहरूको प्रशासनिक तथा साधारण खर्च रकम तीन लाखको दरले २७ लाख विनियोजन गरिएको जानकारी दिनुभयो ।
बस्ती तथा वडास्तरबाट छनौट भई आउने योजना सञ्चालन समेत गरी वडा समितिको पुँजीगत खर्चतर्फ ५७ लाखको दरले ५ करोड १३ लाख रुपैयाँ विनियोजन गरिएको समेत उल्लेख गर्नुभयो । चालु आर्थिक वर्षमा सम्पन्न हुन नसकेका योजनाहरूलाई अगामी आर्थिक वर्ष २०८०/०८१ मा सम्पन्न गर्न सोही अनुसार बजेट विनियोजन गरिएको नगरप्रमुख मण्डलले बताउनुभयो ।
नगरपालिकाको अगामी आर्थिक वर्ष २०८०/०८१ को नीति तथा कार्यक्रममा कृषि, पर्यटन, शिक्षा, स्वास्थ्यजस्ता क्षेत्रलाई मुख्य प्राथमिकतामा राखिएको छ । नीति, कार्यक्रम तथा बजेट प्रस्तुत गर्नुहुँदै नगरप्रमुख मण्डलले स्थानीय जनताको जीवनस्तर माथि उकास्न स्थानीय ज्ञान, सीप र क्षमतालाई प्रश्रय दिने नीति अवलम्बन गरिने बताउनुभयो ।
नगरपालिकाको कार्यहरूमा पारदर्शिता, आर्थिक अनुशासन तथा सामाजिक न्यायलाई अङ्गीकार गर्दै भ्रष्टाचारमुक्त विधिको शासन व्यवस्थाको सुनिश्चितता गरिने उहाँको भनाई थियो । नगर निर्माणको कार्यमा समुदाय, सहकारी, गैरसरकारी तथा निजी क्षेत्र लगायत साझेदार संघसंस्थाहरुको सहकार्य आवश्यक हुने बताउनुहुँदै नगरप्रमुख मण्डलले भन्नुभयो ‘सहभागितामूलक साझेदारीलाई प्रश्रय दिने र बहु लगानीको सम्भावना बढाउने कार्यहरूलाई प्राथमिकता दिइनेछ ।’
संघीय सरकारका श्रम, रोजगार तथा सामाजिक सुरक्षा मन्त्री शरतसिंह भण्डारीको प्रमुख आतिथ्यमा आयोजित नगरसभाको उद्घाटन समारोहमा प्रदेश सांसदहरु अभिराम शर्मा, रानी शर्मा तिवारी, जयनुल राईन, रमिता प्रधान, नगरउपप्रमुख मंजुदेवी साह, नगरसभा सदस्यहरु, विभिन्न राजनीतिक दलका प्रतिनिधिहरू लगायतको उपस्थिति रहेको थियो ।
Discussion about this post