लगातारको वर्षाले सप्तरीको सकरपुरा जलमग्न, प्रदेश सभा सदस्य सिंहले गरे निरिक्षण

सप्तरी/श्रावण २३ गते । सप्तरीमा सोमबारदेखि भएको अविरल बर्षाले गर्दा विभिन्न स्थानमा पानी जमेको छ । सप्तरीको दक्षिणी भेगमा रहेको सकरपुरमा वर्षाको पानी घरहरुमा पसेको छ । पानीले कलहरु समेत डुबानमा परेका छन् ।

वर्षाको पानीको निकास नहुदाँ सकरपुराको राजपुत टोल र राम टोलको २५ भन्दा बढी घरहरु डुबानमा परेको छ । बर्षाको पानीसँगै वस्तीदेखि पश्चिम र उत्तरतर्फका खेतहरुबाट आउने पानीले बस्ती डुबानमा परेको पालिका विपद् व्यवस्थापन अधिकृत राजेश कुमार झाले जानकारी दिए ।

तिलाठी कोइलाडी गाउँपालिकाका अध्यक्ष अरुण कुमार मण्डल, वडा अध्यक्ष रमेश मुखिया, विपद् ब्यवस्थापन अधिकृत राजेश कुमार झा, सामाजिक विकास शाखाका किशोर कुमार झासहितको टोलीले त्यहाँको स्थलगत अवलोकन गरेका छन् ।

जलमग्न रहेको सकरपुरवासीको समस्या हेर्न मधेश प्रदेश सभा सदस्य सतिश कुमार सिंहले पनि स्थलगत निरीक्षण गरेका छन् ।
उनले आफ्नो समाजिक संजालमा पोस्ट लेख्दै निरिक्षण गरेको जानकारी दिएका छन् ।

फेसबुक पोस्टमा उनले लेखेका छन्, ‘अविरल बर्षाको कारण ति.को.गा.पा.वडा न. ३ सकरपुरामा घर घर मा पानी ले डुबान छ साथै खानेपानी को कल पनि डुबेको छ जनजिवन अस्त ब्यस्त भएको छ स्थानीयको समस्या हेर्न स्थलगत निरीक्षण गरे ।’