जनकपुरधाम/असोज २ गते। अन्तर्राष्ट्रिय सौन्दर्य प्रतियोगिता ‘मिस वेलनेस वर्ल्ड २०२६’ को उपाधि जित्न सफल जनकपुरधामकी सान्वी मण्डललाई उनको गृहगाउँ भोइलमा विशेष स्वागत तथा सम्मान गरिएको छ। अन्तर्राष्ट्रिय मञ्चमा नेपालको नाम चिनाउन सफल सान्वीलाई मधेश प्रदेश सभाका सभामुख रामअशिष यादवले विशेष समारोहबीच दोसल्ला ओढाएर तथा फूलमाला लगाएर सम्मान गर्नुभएको हो।
जनकपुरधाम उपमहानगरपालिका–१८ स्थित भोइल गाउँमा जन्मिएकी सान्वीले थाइल्यान्डको राजधानी बैंककमा सम्पन्न ‘मिस वेलनेस वर्ल्ड २०२६’ प्रतियोगितामा विश्वका विभिन्न देशका प्रतिस्पर्धीलाई पछि पार्दै मुख्य उपाधि जित्न सफल भएकी थिइन्। सेप्टेम्बर २७ मा बैंककस्थित क्यालिप्सो क्याबरेमा आयोजित प्रतियोगिताको अन्तिम चरणमा उनले उक्त उपाधि हासिल गरेकी हुन्। प्रतियोगितामा २६ देशका प्रतिनिधिहरू सहभागी भएका थिए।
२२ वर्षिया सान्वी काठमाण्डौमा एमबीएमा अध्ययनरत छिन् । कमर्श क्याम्पसबाट बीबीए, ट्रिनिटी कलेजबाट ११ र १२ तथा जनकपुरधाम स्थित सिद्धार्थ सेकेण्ड्रीबाट एसईई उतीर्ण गरेकी थिइन् ।
नेपालकी सान्वीसँगै क्यानाडाकी प्रतिनिधिले ‘मिस वेलनेस वल्र्ड इन्टरनेसनल २०२६’, स्विट्जरल्यान्डकी प्रतिनिधिले ‘मिस वेलनेस वर्ल्ड क्रिएटिभ २०२६’, मोरक्कोकी प्रतिनिधिले ‘मिस वेलनेस वल्र्ड ह्युमनिटेरियन २०२६’ र इटालीकी प्रतिनिधिले ‘मिस वेलनेस वल्र्ड डिस्टिङ्क्सन २०२६’ उपाधि प्राप्त गरेकी छिन् ।
सान्वीको अन्तर्राष्ट्रिय सफलतापछि जन्मभूमि भोइलका बासिन्दाले उत्साहपूर्वक स्वागत गर्दै सम्मान कार्यक्रम आयोजना गरेका हुन्। उनको उपलब्धिले भोइल गाउँसँगै जनकपुरधाम, मधेश प्रदेश र समग्र नेपाललाई अन्तर्राष्ट्रिय स्तरमा चिनाउन योगदान पुर्याएको स्थानीयले बताएका छन्।
समाजसेवी ई. विजय कुमार मण्डलको अध्यक्षतामा सम्पन्न सम्मान कार्यक्रमको संयोजन बौधी माई पूजा समितिका अध्यक्ष भोगेन्द्र मण्डलले गर्नुभएको थियो। कार्यक्रममा भोइल गाउँका बासिन्दाले सहयोग तथा सहकार्य गरेका थिए।
समारोहमा मधेश प्रदेशसभा सदस्य ममता देवी मण्डल, ई. मनोज कुमार मण्डल, अरविन्द कुमार मण्डल, कमलेश मण्डललगायत स्थानीय बासिन्दाको उल्लेखनीय सहभागिता रहेको थियो। कार्यक्रम शिक्षक राम सिनेही मण्डलले सञ्चालन गर्नुभएको थियो।
समाजसेवी सञ्जय मण्डल र सविता मण्डलकी छोरी सान्वीले अन्तर्राष्ट्रिय सौन्दर्य प्रतियोगितामा प्रतिष्ठित उपाधि हासिल गरेपछि गाउँमा खुसी र उत्साह छाएको छ। आफ्नो गाउँकी छोरीले विश्वस्तरको प्रतियोगितामा सफलता हासिल गरेको भन्दै स्थानीयवासीले उनको उपलब्धिलाई गर्वका रूपमा लिएका छन्।
सान्वीको सफलताको यात्रा राष्ट्रिय स्तरको सौन्दर्य प्रतियोगिताबाट अघि बढेको हो। उनी यसअघि ‘मिस नेपाल २०२५’ मा प्रतियोगी नम्बर १ का रूपमा सहभागी भएकी थिइन्। उक्त प्रतियोगितामा उत्कृष्ट १२ मा स्थान बनाउन सफल भएकी सान्वीले त्यसपछि अन्तर्राष्ट्रिय प्रतियोगितामा प्रतिस्पर्धा गर्दै विश्व उपाधि जित्न सफल भएकी हुन्।
यसअघि सान्वीले ‘मिस नेपाल २०२५’ प्रतियोगितामा समेत सहभागिता जनाएकी थिइन्। प्रतियोगी नम्बर १ का रूपमा प्रतिस्पर्धा गरेकी उनी उत्कृष्ट १२ मा स्थान बनाउन सफल भएकी थिइन्। मिस नेपालमा प्राप्त अनुभव र त्यसपछि निरन्तर अघि बढेको उनको यात्राले उनलाई अन्तर्राष्ट्रिय प्रतियोगितामा उपाधि जित्नेसम्म पुर्याएको हो।
जनकपुरधामबाट अन्तर्राष्ट्रिय मञ्चसम्म पुगेर उपाधि जित्न सफल सान्वीको उपलब्धिले मधेश प्रदेशको प्रतिभा र सम्भावनालाई समेत उजागर गरेको छ। उनको सफलताले नेपाली युवतीहरूलाई राष्ट्रिय तथा अन्तर्राष्ट्रिय स्तरका प्रतियोगितामा सहभागी भई आफ्नो प्रतिभा प्रदर्शन गर्न प्रेरणा दिने अपेक्षा गरिएको छ।
सान्वीको यो उपलब्धिले जनकपुरधाम र मधेश प्रदेशमा खुसी तथा गौरवको वातावरण सिर्जना गरेको छ। अन्तर्राष्ट्रिय सौन्दर्य प्रतियोगितामा नेपालको प्रतिनिधित्व गर्दै उपाधि हासिल गर्नुले नेपाली प्रतिभाले विश्वस्तरमा आफ्नो पहिचान स्थापित गर्न सक्ने सन्देशसमेत दिएको छ।
भोइल गाउँबाट अन्तर्राष्ट्रिय मञ्चसम्म पुगेर सफलता हासिल गरेकी सान्वीको उपलब्धिले नेपाली युवतीहरूलाई आफ्नो प्रतिभा, क्षमता र आत्मविश्वासका साथ अघि बढ्न प्रेरणा दिने अपेक्षा गरिएको छ। उनको सफलताले स्थानीय प्रतिभालाई राष्ट्रिय तथा अन्तर्राष्ट्रिय स्तरमा अवसर प्रदान गर्नुपर्ने आवश्यकतालाई समेत उजागर गरेको छ।
Discussion about this post