रश्मिकाले आफैं बिहे गर्न भनेकी हुन्, मैले हाेइन्: विजय देवरकोंडा

मुम्बई, २ कात्तिक। विजय देवरकोंडाले खुलासा गरेका छन् कि उनले रश्मिका मन्दानालाई कहिल्यै औपचारिक रूपमा विवाहको प्रस्ताव राखेका थिएनन्, बरु रश्मिका आफैंले उनलाई विवाह गर्न भनेकी थिइन्।

‘कफी विथ करण’ सिजन ९ को एउटा नयाँ प्रोमोमा यो जोडीले यसबारे बताएका छन्। विवाहपछि उनीहरू पहिलो पटक सँगै यस शोमा देखा परेका हुन्।

उक्त प्रोमोमा, कार्यक्रम प्रस्तोता करण जोहरले यो जोडीलाई उनीहरूबीच विवाहको प्रस्ताव राखिएको थियो कि थिएन भनेर सोध्छन्। रश्मिकाले टाउको हल्लाएर ‘होइन’ भन्ने सङ्केत गर्छिन्, जसपछि विजयले उनीहरूबीच विवाहको कुराकानी कसरी सुरु भयो भन्नेबारे बताउँछन्।

करणको प्रश्नको जवाफ दिँदै विजय भन्छन्, “उनी भन्थिन्- ‘ल बिहे गरौँ न त।’ अनि म भन्थें- ‘हुन्छ, तिमीले मलाई सय पटक सोधिसक्यौ नि !’

त्यसपछि करण रश्मिकातिर फर्किएर सोध्छन् कि के उनले साँच्चै सय पटक बिहेको कुरा उठाएकी थिइन्। अभिनेत्रीले स्पष्ट पार्दै भनिन्, “मैले उनलाई पूरै एक वर्षसम्म सोधिरहें।”

विजयले थप्दै भने, “म त्यस्तो खराब मान्छे त होइन नि।”

यो प्रोमोमा एउटा ‘र्यापिड-फायर’ राउन्ड पनि समावेश छ, जसमा करणले रश्मिकालाई ‘पुष्पा’ का सह-कलाकार अल्लु अर्जुन र ‘एनिमल’ का सह-कलाकार रणवीर कपुरमध्ये एकलाई रोज्न भन्छन्। उनले अल्लु अर्जुनलाई रोज्छिन्।

त्यसपछि करणले विजयलाई सोध्छन् कि रश्मिका बाहेक, पर्दामा उनको ‘अन-स्क्रिन केमेस्ट्री’ (जोडीको तालमेल) सबैसँग राम्रो छ? विजयले जवाफ दिनुअघि नै रश्मिकाले बीचैमा भनि हाल्छिन्, “कोही पनि छैन।”

त्यसपछि विजयले वैवाहिक जीवनबारे एउटा रमाइलो टिप्पणी गर्दै भन्छन्, “विवाहको नियम नम्बर १०१: श्रीमतीले भनेको कुरामा सहमति जनाउनु,” जसले रश्मिकालाई हँसाउँछ। यो रमाइलो कुराकानीमा उनीहरूले आफ्नो व्यक्तिगत र व्यावसायिक जीवनबारे प्रश्नहरूको जवाफ दिँदै एकअर्कालाई जिस्काएको देख्न सकिन्छ।

यो एपिसोडमा रश्मिका पहिलो पटक ‘कफी विथ करण’ मा देखा परेकी छिन्। यता विजय भने यसअघि सिजन ७ मा आफ्नी ‘लाइगर’ सह-कलाकार अनन्या पाण्डेसँग यो शोमा सहभागी भइसकेका थिए। नवौं सिजनको सुरुआत सलमान खानलाई पहिलो अतिथिका रूपमा निम्त्याएर गरिएको थियो।