सन्त तुलसी जयन्ती महोत्सव बुधबार (भदौ ३ गते) जनकपुरधाममा भव्य रूपमा मनाइँदै

जनकपुरधाम/भदौ २ गते। रामचरितमानसका रचयिता सन्त शिरोमणि गोस्वामी तुलसीदासको जयन्ती महोत्सव बुधबार जनकपुरधाममा भव्यताका साथ मनाइने भएको छ।

श्री रामानन्दीय वैष्णव संघको आयोजनामा साउन २६ गतेदेखि सुरु भएको नौ दिवसीय तुलसी जयन्ती महोत्सवअन्तर्गत बुधबार तुलसी जयन्ती विशेष धार्मिक तथा सांस्कृतिक कार्यक्रमसहित मनाउन लागिएको हो।

संघका अध्यक्ष महन्थ रामरोशन दास वैष्णवले मंगलबार तुलसी स्मारक सदनमा आयोजित पत्रकार सम्मेलनमार्फत महोत्सवका कार्यक्रमबारे जानकारी दिएका हुन्। उनले तुलसीदासको धार्मिक, साहित्यिक तथा आध्यात्मिक योगदानको स्मरण गर्दै जयन्तीलाई भव्य र सभ्य रूपमा मनाउने तयारी गरिएको बताए।

महन्थ वैष्णवले जयन्तीका अवसरमा आयोजना हुने शोभायात्रामा जनकपुरधामवासी, साधुसन्त, श्रद्धालु तथा धर्मप्रेमी सर्वसाधारणलाई सहभागी हुन आह्वानसमेत गरेका छन्।

आयोजकका अनुसार बुधबार बिहान ८ बजे तुलसीदासको विशेष अभिषेक कार्यक्रम हुनेछ। दिउँसो १ बजे नवाह पारायणको समापन गरिनेछ। सोही अवसरमा सन्तमहन्थ तथा विद्वान्हरूबाट गोस्वामी तुलसीदासको जीवन, दर्शन, साहित्यिक योगदान तथा रामचरितमानसको धार्मिक महत्वका विषयमा प्रवचन तथा चर्चा गरिने कार्यक्रम रहेको छ।

त्यसपछि दिउँसो ३ बजे धार्मिक झाँकी तथा शोभायात्रासहित नगर परिक्रमा गरिनेछ। शोभायात्रामा साधुसन्त, धार्मिक संघसंस्था, श्रद्धालु तथा स्थानीयवासीको उल्लेख्य सहभागिता रहने आयोजकले जनाएको छ।

तुलसीदासले रचना गरेको रामचरितमानसले सनातन धर्म, भक्ति, नैतिकता र मानवीय मूल्यको प्रवद्र्धनमा महत्वपूर्ण भूमिका खेलेको भन्दै आयोजकले तुलसी जयन्तीलाई धार्मिक आस्था र साहित्यिक चेतनाको उत्सवका रूपमा मनाउँदै आएको जनाएको छ।

नौ दिवसीय महोत्सवअन्तर्गत विभिन्न धार्मिक अनुष्ठान, नवाह पारायण, प्रवचन तथा पूजाआजासहितका कार्यक्रम सञ्चालन हुँदै आएका छन्। बुधबार हुने मुख्य जयन्ती समारोहसँगै यस वर्षको महोत्सव विशेष आकर्षणका साथ सम्पन्न हुने आयोजकको विश्वास छ।

श्री रामानन्दीय वैष्णव संघले तुलसी जयन्तीको शोभायात्रालाई सफल बनाउन जनकपुरधामका विभिन्न धार्मिक, सामाजिक तथा सांस्कृतिक संघसंस्था र सर्वसाधारणलाई सक्रिय सहभागिताका लागि आग्रह गरेको छ।