जनकपुरधाम/साउन २३ गते । श्री राम युवा कमिटी जनकपुरधामको नवनिर्वाचित कार्यसमितिको पदस्थापना तथा शपथ ग्रहण कार्यक्रम भव्यताका साथ सम्पन्न भएको छ। कार्यक्रममा नवनिर्वाचित अध्यक्ष विजय साहसहित सम्पूर्ण पदाधिकारी तथा सदस्यहरूले शपथ ग्रहण गरेका छन्।
श्री राम युवा कमिटीका निवर्तमान अध्यक्ष सरोज कुमार साहको अध्यक्षतामा आयोजित कार्यक्रममा मधेस प्रदेशका मुख्यमन्त्री कृष्णप्रसाद यादव प्रमुख अतिथिका रूपमा उपस्थित थिए। मुख्यमन्त्री यादवको उपस्थितिमा नवनिर्वाचित अध्यक्ष साह सहित नयाँ कार्यसमितिका पदाधिकारी तथा सदस्यहरूलाई पद तथा गोपनीयताको शपथ ग्रहण गराइएको थियो।
पदस्थापनासँगै नयाँ कार्यसमितिले कमिटीको आगामी कार्यकालमा सामाजिक, धार्मिक, सांस्कृतिक तथा युवामैत्री गतिविधिलाई प्राथमिकताका साथ अघि बढाउने प्रतिबद्धता जनाएको छ। श्रीराम युवा कमिटीले जनकपुरधामको सामाजिक तथा धार्मिक गतिविधिमा लामो समयदेखि महत्वपूर्ण भूमिका निर्वाह गर्दै आएको बताइएको छ।
कार्यक्रममा वक्ताहरूले युवाहरूलाई सामाजिक उत्तरदायित्व निर्वाह गर्दै समाज परिवर्तनमा सक्रिय भूमिका खेल्न आग्रह गरेका थिए। उनीहरूले धार्मिक तथा सांस्कृतिक पहिचानको संरक्षणसँगै जनकपुरधामको विकास र सामाजिक सद्भाव कायम गर्न युवा पुस्ताको भूमिका महत्वपूर्ण रहेको बताएका थिए।
नवनिर्वाचित अध्यक्ष विजय साहले आफूलाई प्रदान गरिएको जिम्मेवारीलाई इमानदारीपूर्वक निर्वाह गर्दै श्रीराम युवा कमिटीलाई थप सक्रिय र प्रभावकारी बनाउने प्रतिबद्धता व्यक्त गरे। उनले कमिटीलाई सबै युवाको साझा संस्था बनाउँदै सामाजिक सेवा, धार्मिक–सांस्कृतिक संरक्षण र समुदायको हितमा विभिन्न कार्यक्रम सञ्चालन गर्ने बताए।
कार्यक्रममा निवर्तमान कार्यसमितिलाई धन्यवाद दिँदै नयाँ कार्यसमितिलाई सफल कार्यकालको शुभकामना समेत दिइएको थियो।
कार्यक्रममा मधेस प्रदेशका पूर्व सांसद दिपेन्द्र ठाकुर, पूर्व स्वास्थ्य मन्त्री वीरेन्द्र सिंह, जनकपुरधाम उपमहानगरपालिकाका मेयर मनोज साह, मनराशिस्वा नगरपालिकाका मेयर मोहन पाण्डे, धनौजी गाउँपालिकाका अध्यक्ष राजकुमार साह, जनकपुरधाम उद्योग वाणिज्य संघका अध्यक्ष सुरेन्द्र भण्डारी लगायतको उपस्थिति थियो।
त्यस्तै, श्रीराम युवा कमिटीका पूर्व अध्यक्षहरू, विभिन्न संघ–संस्थाका पदाधिकारी, समाजसेवी, व्यवसायी, युवा तथा सञ्चारकर्मीहरूको उपस्थिति रहेको थियो।
Discussion about this post