जनकपुरधाममा लायन्स र लियोको भव्य पदस्थापन तथा इन्डक्सन सम्पन्न, लायन्स क्लब जनकपुरधाम हेरिटेजको चार्टर

गिरिजानन्द साह/जनकपुरधाम/साउन २३ गते । लायन्स क्लब अफ जनकपुरधाम, लायन्स क्लब अफ जनकपुरधाम राजधानी, लायन्स क्लब अफ जनकपुरधाम गार्गी, लियो क्लब अफ जनकपुरधाम तथा लियो क्लब अफ जनकपुरधाम क्यापिटलका वर्ष २०२६/२७ का नयाँ कार्यसमितिको पदस्थापन तथा सदस्यहरूको इन्डक्सन कार्यक्रम जनकपुरधाममा सम्पन्न भएको छ। कार्यक्रमको उद्घाटन लायन्स क्लब अफ जनकपुरधाम वर्ष २०२६/२७ का अध्यक्ष प्रसुन्न झा र प्रमुख अतिथी मधेश प्रदेश सभाका सभामुख रम आशिष्ले यादवले गरेका थिए।

सोही अवसरमा नवगठित लायन्स क्लब अफ जनकपुरधाम हेरिटेजको चार्टरसमेत गरिएको छ। समाजसेवा, मानवीय सहयोग र युवाको नेतृत्व विकासमा सक्रिय लायन्स तथा लियो अभियानलाई थप प्रभावकारी बनाउने प्रतिबद्धतासहित कार्यक्रम सम्पन्न भएको हो।

 

कार्यक्रमको अध्यक्षता लायन्स क्लब अफ जनकपुरधाम वर्ष २०२६/२७ का अध्यक्ष प्रसून झाले गरेका थिए। मधेश प्रदेश सभाका सभामुख राम आशिष यादव प्रमुख अतिथिका रूपमा उपस्थित थिए भने पदस्थापन अधिकृत (इन्स्टलेसन अफिसर) का रूपमा लायन्स डिस्ट्रिक्ट गभर्नर लायन अजय प्रसाद खनालको उपस्थिति रहेको थियो।

कार्यक्रममा लायन्स क्लब अफ जनकपुरधाम, लायन्स क्लब अफ जनकपुरधाम राजधानी, लायन्स क्लब अफ जनकपुरधाम गार्गी, लियो क्लब अफ जनकपुरधाम तथा लियो क्लब अफ जनकपुरधाम क्यापिटलका वर्ष २०२६/२७ का नयाँ पदाधिकारी तथा सदस्यहरूलाई पदस्थापन तथा इन्डक्सन गरिएको थियो। नयाँ नेतृत्वले लायन्सको मूल भावना ‘We Serve’ अर्थात् सेवाको भावनालाई आत्मसात गर्दै समाजमा सकारात्मक योगदान पुर्‍याउने प्रतिबद्धता व्यक्त गरेका थिए।

कार्यक्रममा डिस्ट्रिक्ट गभर्नर लायन अजय प्रसाद खनालले लायन्स क्लबको इतिहास, यसको उद्देश्य तथा विश्वभर लायन्सले गर्दै आएको मानवीय सेवाका गतिविधिबारे जानकारी गराएका थिए।

उनले लायन्स केवल एउटा सामाजिक संस्था मात्र नभई विपन्न, असहाय तथा समस्यामा परेका नागरिकलाई सहयोग पुर्‍याउने विश्वव्यापी अभियान भएको बताए। स्वास्थ्य, शिक्षा, वातावरण संरक्षण, विपद् व्यवस्थापन, दृष्टिसम्बन्धी सेवा, रक्तदान तथा युवाको नेतृत्व विकासलगायतका क्षेत्रमा लायन्सले निरन्तर काम गर्दै आएको उनको भनाइ थियो।

खनालले नयाँ नेतृत्वले विगतका राम्रा कामलाई निरन्तरता दिँदै स्थानीय आवश्यकता पहिचान गरेर सेवाका नयाँ कार्यक्रम अघि बढाउनुपर्नेमा जोड दिए। उनले लायन्स र लियो क्लबबीचको सहकार्यलाई अझ बलियो बनाउँदै युवालाई सामाजिक सेवामा जोड्न सके समुदायमा दीर्घकालीन सकारात्मक प्रभाव पार्न सकिने बताए।

उनले पदस्थापित पदाधिकारीहरूलाई जिम्मेवारीसँगै उत्तरदायित्व पनि थपिएको उल्लेख गर्दै संस्थाको गरिमा र सेवाको मूल भावनालाई कायम राखेर काम गर्न आग्रह गरे।

समाजसेवामा लायन्स–लियोको योगदान प्रशंसनीय : सभामुख यादव

कार्यक्रमका प्रमुख अतिथि मधेश प्रदेश सभाका सभामुख राम आशिष यादवले लायन्स तथा लियो क्लबले गर्दै आएको समाजसेवाको प्रशंसा गरे।

उनले समाजमा राज्यको पहुँच पुग्न नसकेका कतिपय स्थानमा सामाजिक संघसंस्थाले महत्वपूर्ण भूमिका निर्वाह गर्दै आएको बताए। लायन्स तथा लियोले स्वास्थ्य, शिक्षा, विपन्न वर्गको सहयोग, रक्तदान, वातावरण संरक्षणलगायतका क्षेत्रमा गर्दै आएको काम समाजका लागि प्रेरणादायी रहेको उनको भनाइ थियो।

सभामुख यादवले ‘संघीयता आर्थिक बोझ होइन, यो अवसर हो’ भन्ने धारणा व्यक्त गर्दै संघीय संरचनाले स्थानीय आवश्यकता र प्राथमिकताका आधारमा विकास तथा सामाजिक सेवा सञ्चालन गर्ने अवसर प्रदान गरेको बताए।

उनका अनुसार संघीयताको उद्देश्य केवल सरकारका तह थप्नु नभई नागरिकलाई सेवा प्रवाहमा सहजता ल्याउनु, स्थानीय आवश्यकतालाई प्राथमिकतामा राख्नु र जनताको सहभागितामा विकास निर्माणलाई अघि बढाउनु हो। संघ, प्रदेश र स्थानीय तहबीच समन्वय तथा सहकार्य बढाउन सके संघीयताको वास्तविक लाभ नागरिकले प्राप्त गर्न सक्ने उनले बताए।

यादवले सामाजिक संघसंस्थाले सरकारसँग सहकार्य गरेर शिक्षा, स्वास्थ्य, सरसफाइ, वातावरण, विपद् व्यवस्थापन तथा सामाजिक चेतनाका क्षेत्रमा अझ प्रभावकारी काम गर्न सक्ने उल्लेख गरे। उनले लायन्स तथा लियो क्लबले आगामी दिनमा पनि सेवामूलक गतिविधिलाई निरन्तरता दिँदै युवालाई समाजसेवामा सक्रिय बनाउन भूमिका खेल्ने विश्वास व्यक्त गरे।

नयाँ नेतृत्वद्वारा सेवामूलक कामलाई प्राथमिकता दिने प्रतिबद्धता

कार्यक्रममा विभिन्न लायन्स तथा लियो क्लबका नवनियुक्त अध्यक्षहरूले ‘असेप्टेन्स स्पिच’ प्रस्तुत गर्दै आफूहरूले प्राप्त गरेको जिम्मेवारीलाई इमानदारीपूर्वक निर्वाह गर्ने प्रतिबद्धता व्यक्त गरेका थिए।

नयाँ अध्यक्षहरूले क्लबका सदस्यहरूबीच सहकार्य र एकतालाई मजबुत बनाउँदै समुदायको आवश्यकता पहिचान गरेर कार्यक्रम सञ्चालन गर्ने बताएका थिए। उनीहरूले स्वास्थ्य, शिक्षा, वातावरण, रक्तदान, विपन्न तथा असहायलाई सहयोग, युवाको क्षमता विकासलगायतका क्षेत्रमा आफ्नो कार्यकालमा प्रभावकारी कार्यक्रम सञ्चालन गर्ने प्रतिबद्धता जनाएका थिए।

उनीहरूले लायन्स तथा लियो क्लबलाई केवल औपचारिक संस्थाका रूपमा नभई समुदायमा प्रत्यक्ष परिवर्तन ल्याउने सेवाको माध्यमका रूपमा विकास गर्ने बताए।

कार्यक्रममा लायन मनिष रमण साहले लायन्स अभियानको मूल उद्देश्य नै मानव सेवामा समर्पित हुनु रहेको उल्लेख गर्दै नयाँ नेतृत्वले संस्थाको उद्देश्यअनुसार काम गर्नुपर्ने बताए। उनले समाजमा आवश्यकतामा रहेका नागरिकसम्म सेवा पुर्‍याउन क्लबका गतिविधिलाई थप व्यवस्थित र प्रभावकारी बनाउनुपर्नेमा जोड दिए।

त्यस्तै लायन मधुकर उपाध्यायले लायन्स तथा लियो क्लबबीचको सहकार्यले समाजसेवाको दायरा अझ फराकिलो बनाउन सक्ने बताए। उनले युवाको ऊर्जा र अनुभवी लायन्स सदस्यहरूको अनुभवलाई एकै ठाउँमा जोड्न सके सामाजिक क्षेत्रमा उल्लेखनीय उपलब्धि हासिल गर्न सकिने धारणा राखे।

उनले लायन्सको सदस्यता केवल पद प्राप्त गर्ने विषय नभई सामाजिक उत्तरदायित्व बहन गर्ने अवसर भएको भन्दै प्रत्येक सदस्यले आफ्नो क्षेत्रमा सकारात्मक परिवर्तन ल्याउन सक्रिय हुनुपर्ने बताए।

लायन्स क्लब अफ जनकपुरधाम हेरिटेजको चार्टर

कार्यक्रममा नवगठित लायन्स क्लब अफ जनकपुरधाम हेरिटेजको चार्टर गरिएको छ। नयाँ क्लबको स्थापनासँगै जनकपुरधाममा लायन्स अभियानको विस्तार थप भएको चार्टर अध्यक्ष विकास साहले बताएका छ्न ।

नयाँ क्लबले जनकपुरधाम तथा आसपासका क्षेत्रमा आवश्यकता पहिचान गरी सामाजिक तथा मानवीय सेवाका कार्यक्रम सञ्चालन गर्ने अध्यक्ष विकास साहले बताए । क्लबको चार्टरले स्थानीय स्तरमा सेवामूलक गतिविधि विस्तार हुनुका साथै लायन्स अभियानमा नयाँ सदस्य तथा युवाहरूको सहभागिता बढ्ने विश्वास व्यक्त गरिएको छ।

कार्यक्रममा वक्ताहरूले नयाँ कार्यसमितिलाई बधाई तथा शुभकामना दिँदै लायन्स र लियो अभियानलाई जनताको आवश्यकता र समुदायको समस्यासँग जोडेर अघि बढाउन सुझाव दिएका थिए।

लायन्स क्लबले अनुभवी नेतृत्व र लियो क्लबले युवाको ऊर्जा तथा सिर्जनशीलतालाई संयोजन गरेर अघि बढ्न सके जनकपुरधाममा सामाजिक सेवाको नयाँ उदाहरण प्रस्तुत गर्न सकिने वक्ताहरूको भनाइ थियो। कार्यक्रमको सञ्चालन लायन्स क्लब अफ जनकपुरधामको निवर्तमान अध्यक्ष डा. राजेश साह ले गरेको थियो।

कार्यक्रममा लायन्समा १० बर्ष देखि ५० बर्ष सम्म लागेर योगदान पुर्‍याएका लाइन्सहरूलाई अन्तर्राष्ट्रिय सम्मानबाट सम्मानित गरिएको थियो । साथै लायन्स क्लबमा डोणेट गरेको लायन्सहरुलाई सम्मान गरिएको थियो र अन्य शिर्षकहरुमा पनि मायको चिनो सहित सम्मान गरिएको थियो। लायन्स क्लब अफ जनकपुरधाम, लायन्स क्लब अफ जनकपुरधाम राजधानी, लायन्स क्लब अफ जनकपुरधाम गार्गी, लायन्स क्लब अफ जनकपुरधाम हेरिटेज, लियो क्लब अफ जनकपुरधाम तथा लियो क्लब अफ जनकपुरधाम क्यापिटलका वर्ष २०२६/२७ का पदाधिकारी तथा सदस्यहरूको सहभागिता रहेको थियो।

कार्यक्रममा लायन्स क्लब अफ जनकपुरधामको ५० बर्ष पूरा भएको अवसरमा यो बर्ष मनाउन लागेको स्वर्ण महोत्सवको लोगो अनावरण पनि गरिएको छ।

त्यसैगरी लायन्स तथा लियोका पूर्वअध्यक्ष, सदस्य, समाजसेवी, विभिन्न क्षेत्रका प्रतिनिधि तथा सञ्चारकर्मीहरूको समेत उल्लेख्य उपस्थिति रहेको थियो।