साङ्लाले निकै दुःख दिएको छ, उसो भए अपनाउनुहोस् यी घरेलु उपाय

घर जतिसुकै सफा भए पनि भान्सा वा बाथरुममा अचानक साङ्लो देखिनु जोकोहीका लागि पनि अप्रिय वा विचलित पार्ने अनुभव हुन सक्छ।

प्रायः राति भान्साको बत्ती बाल्दा सिंक, फ्रिज वा चुलोको छेउछाउमा साङ्लोहरू यताउता दौडिरहेको देखिन्छ। यो समस्या केवल सरसफाइ वा स्वच्छतासँग मात्र सम्बन्धित छैन, साङ्लोहरूले हानिकारक ब्याक्टेरिया बोक्न सक्छन् र खानेकुरा वा खाना तयार पार्ने ठाउँहरूलाई दूषित बनाउन सक्छन्। तिनका दिसा र शरीरबाट निस्कने अन्य पदार्थले केही मानिसहरूमा एलर्जी र दमको समस्या बढाउन सक्छन्।

साङ्लालाई मारेर मात्र तिनबाट छुटकारा पाउन सकिँदैन । घरभित्र तिनका लागि खाना, पानी र लुक्ने ठाउँहरू हटाउनु पनि उत्तिकै आवश्यक छ। केही सामान्य उपायहरू अपनाएर तिनको संख्या घटाउन र तिनलाई पुनः आउनबाट रोक्न सकिन्छ।

साङ्लाहरू प्रायः खानाको खोजीमा भान्सा कोठातिर आकर्षित हुन्छन्। भुइँ वा भान्साको काउन्टरमा खसेका खानाका साना टुक्राहरूले पनि तिनलाई आकर्षित गर्न सक्छन् । त्यसैले, खसेको खाना वा तरल पदार्थलाई तुरुन्तै सफा गर्नुहोस्। खानेकुराहरूलाई खुला नछोडी हावा नछिर्ने (एयरटाइट) भाँडाहरूमा राख्नुहोस्। फोहोर भाँडाहरू रातभरि धारामा नछोड्नुहोस् । खाना खाइसके पछि तिनलाई धुनु सबैभन्दा राम्रो हुन्छ। साथै, ग्याँस चुलो, फ्रिज र अन्य उपकरणहरूको मुनि र पछाडिको भाग नियमित रूपमा सफा गर्नुहोस्, किनकि त्यहाँ चिल्लो पदार्थ र खानाका कणहरू जम्मा हुन सक्छन्।

बाँच्नका लागि साङ्लालाई खानाका साथै पानीको पनि आवश्यकता पर्छ ।  त्यसैले भान्सा र बाथरुममा ओसिलोपन कम गर्नु महत्त्वपूर्ण छ। चुहिने धारा वा पाइपहरूको मर्मत गर्नुहोस्। सकेसम्म प्रयोग पछि धारा र बाथटबलाई सुक्खा राख्नुहोस् र भुइँ वा काउन्टरटपमा पोखिएको पानी लामो समयसम्म त्यत्तिकै नछोड्नुहोस्। सधैं ओसिलो रहने ठाउँहरूमा हावा आवतजावतको राम्रो व्यवस्था गर्नाले पनि मद्दत पुग्छ।

साङ्लाहरू घरभित्र एकदमै साना चिराहरूबाट पनि पस्न सक्छन्। भित्ता, भुइँ, झ्याल र ढोकाका चौकोसमा भएका खाली ठाउँहरू बन्द गर्न सकिन्छ। साथै, घरभित्र पाइप र तारहरू प्रवेश गर्ने ठाउँ वरपरका खाली भागहरू पनि जाँच गर्नुहोस्। बजारबाट सामानहरू घर ल्याउँदा कार्डबोर्डका बाकस र झोलाहरू राम्ररी जाँच गर्नुपर्छ किनकि तिनभित्र साना साङ्ला वा तिनका अण्डा लुकेर आएका हुन सक्छन्। लामो समयसम्म सामान भण्डारण गर्न कार्डबोर्डका बाकसको सट्टा राम्ररी बन्द हुने प्लास्टिकका भाँडाहरू प्रयोग गर्न सकिन्छ।

भान्साको फोहोरको भाँडामा जम्मा हुने खानेकुराका अवशेषहरू साङ्लाका लागि सजिलो आहारा बन्न सक्छन्। त्यसैले, बिर्को भएको फोहोरको भाँडा प्रयोग गर्नुहोस् र नियमित रूपमा फोहोर फाल्नुहोस्। फोहोर र पुनः प्रयोगयोग्य सामग्री राख्ने भाँडाहरू समय समयमा सफा गर्नु पनि उत्तिकै महत्त्वपूर्ण छ। यदि तपाईँसँग घरपालुवा जनावरहरू छन् भने तिनको खाना खुला भाँडामा रातभर नछोड्नुहोस् । बरु, यस्तो खानालाई राम्ररी बन्द हुने भाँडामा राख्नु सबैभन्दा राम्रो हुन्छ।

घरमा साङ्लाको बढी उपस्थिति भएका ठाउँहरू पत्ता लगाउन ‘स्टिकी ट्र्याप’ को प्रयोग गर्न सकिन्छ। यस्ता पासोहरू धारामुनि, फ्रिज वा अन्य उपकरणहरूको पछाडि तथा साङ्लाहरू बारम्बार देखिने ठाउँहरूमा राख्न सकिन्छ। साङ्ला नियन्त्रणका लागि ‘बेट’ अर्थात साङ्लालाई आकर्षित गर्ने विषालु आहाराको पनि प्रयोग गरिन्छ  । यस्ता बेटहरू साङ्लाको बढी चहलपहल हुने ठाउँमा राख्नुपर्छ। यदि बेटको प्रयोग गर्दै हुनुहुन्छ भने त्यसमाथि कीटनाशक औषधि छर्कनु हुँदैन किनभने यसले साङ्लालाई बेटको नजिक आउनबाट रोक्न सक्छ।

साङ्ला नियन्त्रण गर्न बोरिक एसिडको पनि प्रयोग गरिन्छ। यसलाई पर्खालका चिराहरू र साङ्ला लुक्ने ठाउँहरूमा एकदमै थोरै मात्रामा प्रयोग गरिन्छ। यद्यपि, यसलाई खानेकुरा वा पानीका स्रोतहरू नजिक प्रयोग गर्नु हुँदैन। सबैभन्दा महत्त्वपूर्ण कुरा बोरिक एसिडलाई बालबालिका र घरपालुवा जनावरहरूको पहुँचभन्दा पूर्ण रूपमा टाढा राख्नुपर्छ । यसको गलत प्रयोग हानिकारक हुन सक्छ।