अभिभावकलाई कम्प्युटर पढाउँदै चितवन पुलिस स्कुल

चितवन/असार २८ गते। नेपाल पुलिस स्कुल शान्तिपुर चितवनले आफ्ना अभिभावकहरुलाई आजदेखी निशुल्क कम्प्युटर प्रशिक्षण कार्यक्रम संचालन गरेको छ।

विद्यार्थीहरुको घरेलु शैक्षिक वातावरणलाई अझै प्रभावकारी बनाउन अभिभावकहरुलाई समेत सुचना प्रविधी सम्बन्धि ज्ञान सिप प्रदान गर्ने उद्धेश्यले कम्प्युटर प्रशिक्षण कार्यक्रम संचालन गरिएको हो ।

अभिभावकहरुलाई कम्प्युटरको प्रयोग देखी सामाजिक संजालबाट हुने गैह्रकानुनी गतिविधीका साथै आफ्ना छोराछोरीहरुले कम्प्युटर, मोबाईलमा के चलाउँदै छन भन्ने सम्मको निग्रानि गर्न सक्ने  दक्षता प्रदान गर्न प्रशिक्षण संचालन गरीने भएको छ ।

अभिभावकहरुलाई कम्प्युटरको आधारभुत ज्ञान, सुचना प्रविधीको आवश्यक्ता एवम प्रयोग, साईब्रर क्राइम, विभिन्न डिजिटल एप्लिकेशनको प्रयोग, स्कुल एपको संचालनका साथै अनलाईन मार्फत हुन सक्ने ठगीको सम्बन्धमा ज्ञान सिप प्रदान गर्ने बिषयबस्तु समेटेर पाँच कार्यदिन अवधीको तालिम संचालन गरीएको हो ।

विद्यालयको कक्षा १ देखी ५ सम्म अध्ययनरत विद्यार्थीका अभिभावकलाई पाँच दिन सम्म दैनिक डेढ घण्टाका दरले विद्यालयका शिक्षक, प्रविधी सम्बन्धी ज्ञान भएका प्रहरी कर्मचारीहरुले प्रशिक्षण संचालन गर्ने छन । विद्यालय व्यवस्थापन समितिका सदस्य एवम जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलले आज एक कार्यक्रमका वीच ५ दिने निशुल्क कम्प्युटर प्रशिक्षण कार्यक्रमको उदघाटन गरेका छन ।

विद्यालय र अभिभावक वीचको पारस्परीक सम्बन्धलाई वस्तुनिष्ठ बनाउने, सुचना प्रविधीमा अब्बल हुँदै गरेका आफ्ना सन्ततिहरुलाई थप हौसला प्रदान गर्ने एवम वर्तमान आधुनिक प्रविधीको समयलाई सहजै आत्मासाथ गर्न सक्ने वातावरण तयार गर्ने उद्धेश्यले प्रशिक्षण कार्यक्रम संचालन गरीएको विद्यालयका समादेशक प्रहरी निरीक्षक थापाले जानकारी दिए ।

विद्यार्थीलाई नियमित पठनपाठनमा सुचना प्रविधीका साथै विभिन्न डिजिटल साधन स्रोतको प्रयोग अनिवार्य जस्तै भएको अवस्थामा अभिभावकले उक्त तथ्यलाई गलत तबरले बुझिदिने एवम विद्यार्थीहरुले समेत प्रविधीको दुरुपयोग गरेर पठनपाठनलाई वेवास्ता गर्ने जस्ता समस्या देखी पर्ने गरेको हुँदा अभिभावकहरुलाई सुचना प्रविधीको महत्व, आवश्यक्ता र सदुपयोका बारेमा जानकारी गराउँदा विद्यार्थीहरुको घरेलु शैक्षिक वातावरण सृजनात्मक एवम सहज बनाउने उद्देश्यले प्रशिक्षण कार्यक्रम संचालन गरीएको समादेशक थापाले जानकारी दिए ।

प्रथम चरणमा कक्षा १ देखी ५ सम्म अध्ययरत विद्यार्थीहरुको २० जना अभिभावकलाई प्रशिक्षण संचालन गरीने छ । विद्यालयमा आफ्ना छोराछोरीले प्रयोग गर्ने कम्प्युटर ल्याबमै बसेर अभिभावकहरुले ५ दिन सम्म सुचना प्रविधीका विभिन्न बिषयहरुमा ज्ञान सिप सिक्नेछन । अबको ५ दिन सम्म अभिभावकहरुले छोराछोरीलाई स्कुल छोड्न आउँदा बिहानको समयमा विद्यालय परिसरमै रहेको कम्प्युटर ल्याबमा कम्प्युटर सिकेर फर्कने छन ।

पाँच कार्यदिन अवधीको प्रशिक्षण पश्चात अभिभावकहरुलाई प्रमाण पत्र समेत प्रदान गरीने छ । नेपाल पुलिस स्कुल शान्तिपुर चितवनमा कक्षा एक देखी १० सम्म गरी ७ सय विद्यार्थी अध्ययरत छन ।