धनुषा/असार २७ गते। मधेश प्रदेश मिडिया काउन्सिलले पत्रकारिता क्षेत्रलाई व्यवस्थित, उत्तरदायी र पत्रकारमैत्री बनाउने उद्देश्यले तयार पारेका तीन वटा कार्यविधिको मस्यौदा माथि प्रदेशभरका पत्रकारसँग सुझाव संकलन तथा छलफल गरेको छ।
धनुषाको मिथिला विहारीस्थित कल्चरल भिलेजमा आयोजित कार्यक्रममा ‘मिडिया काउन्सिल पत्रकारिता पुरस्कार कार्यविधि–२०८३’, ‘पत्रकार कल्याण कोष सञ्चालन कार्यविधि–२०८३’ र ‘आमसञ्चार माध्यमको श्रेणी विभाजन सम्बन्धी कार्यविधि–२०८३’ को मस्यौदा माथि विस्तृत छलफल गरिएको हो।
छलफलमा सहभागी पत्रकारहरूले पत्रकारिता पुरस्कार स्थापना र आपतकालीन अवस्था तथा विपद्मा परेका पत्रकारलाई सहयोग गर्ने उद्देश्यले प्रस्ताव गरिएको पत्रकार कल्याण कोषको स्वागत गरेका छन्। उनीहरूले यी दुवै कार्यविधिलाई आवश्यक सामान्य संशोधनसहित शीघ्र पारित गरी कार्यान्वयनमा लैजान सुझाव दिएका थिए।
यद्यपि, आमसञ्चार माध्यमको श्रेणी विभाजन सम्बन्धी कार्यविधिमा भने थप व्यापक छलफल आवश्यक रहेको सहभागीहरूको धारणा थियो। कार्यविधिले मिडियाको वर्गीकरणसँग सम्बन्धित विषय समेटेकाले सरोकारवालासँग थप परामर्श गरेर मात्र अन्तिम रूप दिनुपर्ने उनीहरूको सुझाव थियो।
कार्यक्रमका प्रमुख अतिथि मधेश प्रदेशका शिक्षा तथा संस्कृतिमन्त्री मनोज कुमार सिंहले पत्रकारहरूको हित र पत्रकारिता क्षेत्रको सुदृढीकरणका लागि ल्याइएका कार्यविधिमा प्राप्त सुझावलाई समेटेर परिमार्जनसहित कार्यान्वयन गर्न आग्रह गरे। उनले पत्रकारहरूको क्षमता विकास, सुरक्षा र पेशागत हितका लागि प्रदेश सरकार आवश्यक सहयोग गर्न प्रतिबद्ध रहेको बताए।
मिडिया काउन्सिलकी कार्यवाहक अध्यक्ष बन्दना झाले छलफलबाट प्राप्त सुझावलाई समेट्दै कार्यविधिलाई परिमार्जन गरी छिट्टै पारित गर्ने दिशामा काउन्सिल अघि बढ्ने जानकारी दिइन्।
कार्यक्रममा आमसञ्चार प्राधिकरणका अध्यक्ष जितेन्द्र खड्का, नेपाल पत्रकार महासंघ मधेश प्रदेशका सचिव हदिस खुदार, महासंघका केन्द्रीय सदस्यहरू राजेश कुमार कर्ण र राजु परियार, केन्द्रीय परिषद् सदस्य अजय कुमार झा, गोरखापत्रका मधेश प्रदेश संयोजक धवेन्द्र झालगायत विभिन्न जिल्ला, प्रदेश तथा केन्द्रका सञ्चारकर्मीहरूको सहभागिता रहेको थियो। सहभागीहरूले पत्रकारिता क्षेत्रलाई थप व्यावसायिक, सुरक्षित र उत्तरदायी बनाउन कार्यविधिहरू व्यवहारिक र समावेशी हुनुपर्नेमा जोड दिएका थिए।
Discussion about this post