स्वास्थ्य प्रवर्द्धन सम्बन्धि मिडियाहरुका लागि सञ्चार तथा पैरवी कार्यक्रम

धनुषा/असार २० गते । मधेश प्रदेशमा स्वास्थ्य प्रवर्द्धनसम्बन्धी सञ्चार माध्यमको भूमिका प्रभावकारी बनाउने उद्देश्यले सञ्चार तथा पैरवी कार्यक्रम सम्पन्न भएको छ।

मधेश प्रदेशको स्वास्थ्य तथा जनसंख्या मन्त्रालय अन्तर्गतको स्वास्थ्य निर्देशनालयद्वारा आयोजित कार्यक्रममा प्रदेशको समग्र स्वास्थ्य अवस्था अपेक्षाअनुसार सन्तोषजनक नरहेको विषयमा विस्तृत छलफल गरिएको थियो। कार्यक्रममा विशेषगरी मातृ तथा शिशु स्वास्थ्य, कुपोषण, सरुवा तथा नसर्ने रोगको बढ्दो चुनौती, स्वास्थ्य सेवामा नागरिकको पहुँच, जनचेतनाको कमी तथा ग्रामीण क्षेत्रका स्वास्थ्य संस्थाले भोगिरहेका समस्याको समाधानमा सञ्चार माध्यमले महत्वपूर्ण भूमिका खेल्नुपर्नेमा जोड दिइएको थियो।

कार्यक्रमका प्रमुख अतिथि मधेश प्रदेशका स्वास्थ्य तथा जनसंख्या मन्त्री नागेन्द्र साहले प्रदेशको स्वास्थ्य क्षेत्र सुधार सरकारको उच्च प्राथमिकतामा रहेको बताए। उनले चालु आर्थिक वर्षको बजेटमा स्वास्थ्य क्षेत्रलाई विशेष प्राथमिकता दिइएको उल्लेख गर्दै विनियोजित बजेटको प्रभावकारी कार्यान्वयन र सदुपयोगमार्फत नागरिकलाई गुणस्तरीय स्वास्थ्य सेवा उपलब्ध गराउने सरकारको प्रतिबद्धता व्यक्त गरे।

स्वास्थ्य तथा जनसंख्या मन्त्रालयका सचिव डा. प्रमोद यादवले नेपालको संविधानले स्वास्थ्य सेवालाई नागरिकको आधारभूत अधिकारका रूपमा सुनिश्चित गरेको स्मरण गराउँदै मधेश प्रदेशका स्वास्थ्यकर्मी संविधान, राष्ट्रिय स्वास्थ्य नीति तथा सम्बन्धित कानुनी व्यवस्थाअनुसार सेवा प्रवाह गरिरहेको बताए।

कार्यक्रममा स्वास्थ्य प्रवर्द्धनका विविध पक्ष, जनस्वास्थ्यका विद्यमान चुनौती, सञ्चार माध्यममार्फत प्रभावकारी पैरवी गर्ने रणनीति तथा स्वास्थ्यसम्बन्धी समाचार सम्प्रेषणका मापदण्डबारे प्रस्तुति र अन्तरक्रिया गरिएको थियो।

सहभागीहरूले स्वास्थ्यसम्बन्धी सही, तथ्यपरक र जनमुखी सूचना प्रवाहमार्फत नागरिकमा जनचेतना अभिवृद्धि गर्न सञ्चार माध्यम र स्वास्थ्य निकायबीच थप समन्वय र सहकार्य आवश्यक रहेको धारणा व्यक्त गरेका थिए।