धनुषाको विभिन्न स्थानीय तहमा वर्षभरि ‘मान्छे बोक्सी हुन्न कहिल्यै’ अभियान सञ्चालन हुने

धनुषा/असार १५ गते । ‘मान्छे बोक्सी हुन्न कहिल्यै’ राष्ट्रिय जागरण प्रतिष्ठानले धनुषाका विभिन्न स्थानीय तहमा आर्थिक वर्ष २०८३/०८४ भरि जनचेतनामूलक अभियान सञ्चालन गर्ने भएको छ। बोक्सी प्रथाजस्ता अन्धविश्वास, लैङ्गिक हिंसा तथा सामाजिक विभेद न्यूनीकरण गर्ने उद्देश्यले अभियान सञ्चालन गर्न लागिएको हो।

प्रतिष्ठानका राष्ट्रिय संयोजक कोविदशरण उपाध्यायले बोक्सीको आरोपमा हुने हिंसा, अपमान र अमानवीय व्यवहार अन्त्य गर्न प्रभावित समुदायमै पुगेर सचेतनामूलक कार्यक्रम सञ्चालन गरिने जानकारी दिए। उनका अनुसार बोक्सीको आरोपमा घटना भएका बस्तीलाई प्राथमिकतामा राखी स्थानीयवासीसँग अन्तरक्रिया, कानुनी सचेतना तथा सामाजिक रूपान्तरणका गतिविधि सञ्चालन गरिनेछ।

उपाध्यायले बोक्सी प्रथाविरुद्ध कानुनी व्यवस्था भए पनि ग्रामीण क्षेत्रमा अन्धविश्वासका कारण महिलामाथि हिंसा र दुर्व्यवहारका घटना अझै भइरहेकाले समुदायस्तरमै चेतना विस्तार गर्नु अभियानको मुख्य उद्देश्य रहेको बताए।

जिल्ला प्रहरी कार्यालय धनुषाको तथ्याङ्कअनुसार आर्थिक वर्ष २०८२/०८३ मा बोक्सीको आरोपसँग सम्बन्धित पाँच वटा घटना दर्ता भएका छन्। प्रतिष्ठानले ती घटनासँग सम्बन्धित क्षेत्रलाई केन्द्रमा राखेर विद्यालय, समुदाय तथा स्थानीय सरोकारवालासँग सहकार्य गर्दै विशेष जनचेतनामूलक कार्यक्रम सञ्चालन गर्ने जनाएको छ।

प्रतिष्ठानका अनुसार अभियानको औपचारिक उद्घाटन प्रतिनिधिसभाकी उपसभामुख रुवी ठाकुरबाट गरिनेछ। अभियानअन्तर्गत बोक्सी प्रथाविरुद्ध कानुनी जानकारी, सामाजिक अन्तरक्रिया, विद्यालय केन्द्रित सचेतना, समुदायस्तरीय संवाद तथा लैङ्गिक हिंसा न्यूनीकरणसम्बन्धी विविध कार्यक्रम सञ्चालन गरिनेछन्।

नेपालमा ‘बोक्सी सम्बन्धी कसुर र सजाय ऐन, २०७२’ लागू भई बोक्सीको आरोप लगाउने, कुटपिट गर्ने वा अमानवीय व्यवहार गर्नेलाई कानुनी कारबाहीको व्यवस्था गरिएको छ। तर अन्धविश्वास र सामाजिक कुरीतिका कारण यस्ता घटना अझै पूर्ण रूपमा नियन्त्रण हुन नसकेको सरोकारवालाहरूको भनाइ छ।

प्रतिष्ठानले अभियानमार्फत अन्धविश्वासविरुद्ध सामाजिक जागरण फैलाउँदै हिंसामुक्त, विभेदरहित र मानवीय समाज निर्माणमा योगदान पुग्ने विश्वास व्यक्त गरेको छ।