धनुषा/असार १३ गते। ‘विश्वसनीय, मर्यादित र व्यावसायिक पत्रकारिता प्रवर्द्धनका लागि आचारसंहिता तथा भाषा र शैली’ विषयक एकदिने अभिमुखीकरण कार्यक्रम शनिबार जनकपुरधाममा सम्पन्न भएको छ।
मिडिया काउन्सिल मधेश प्रदेशको आयोजनामा तथा नेपाल पत्रकार महासङ्घ धनुषा शाखाको समन्वयमा आयोजित कार्यक्रममा मधेश प्रदेशका गृह, सञ्चार तथा कानुनमन्त्री फकिरा महतोले पत्रकारिताले समाजलाई विभाजित गर्नेभन्दा एकताबद्ध बनाउने भूमिका निर्वाह गर्नुपर्नेमा जोड दिए।
उद्घाटन सत्रलाई सम्बोधन गर्दै मन्त्री महतोले सञ्चारकर्मीले सामाजिक उत्तरदायित्व, संवेदनशीलता र व्यावसायिकतालाई केन्द्रमा राखेर पत्रकारिता गर्नुपर्ने बताए। उनले सत्य, निष्पक्ष र जिम्मेवार पत्रकारिताले लोकतन्त्रलाई सुदृढ बनाउने उल्लेख गर्दै सञ्चारमाध्यमले समाजमा सद्भाव, एकता र सकारात्मक सन्देश प्रवाह गर्नुपर्ने धारणा व्यक्त गरे।
स्वतन्त्र र स्वच्छ पत्रकारिता लोकतन्त्रको आधारस्तम्भ भएको उल्लेख गर्दै मन्त्री महतोले प्रेस स्वतन्त्रताको संरक्षण तथा प्रवर्द्धनमा प्रदेश सरकार प्रतिबद्ध रहेको बताए।
कार्यक्रममा पत्रकारिताको आचारसंहिता, जिम्मेवार सञ्चार, भाषा प्रयोग तथा समाचार लेखन शैलीका विषयमा विस्तृत अभिमुखीकरण तथा अन्तरक्रिया गरिएको थियो। वरिष्ठ पत्रकार धर्मेन्द्र झा ले प्रशिक्षण प्रदान गर्दै समाचारमा भाषिक शुद्धता, तथ्य परकता र व्यावसायिक मर्यादाको महत्वबारे प्रकाश पारे।
मधेश मिडिया काउन्सिलकी कार्यवाहक अध्यक्ष वन्दना झाको अध्यक्षतामा सम्पन्न कार्यक्रममा आमसञ्चार प्राधिकरण मधेशका अध्यक्ष जितेन्द्र खड्गा, नेपाल पत्रकार महासङ्घ मधेश प्रदेशका अध्यक्ष श्याम बञ्जारा, महासङ्घका केन्द्रीय सदस्य राजेश कर्ण, नेपाल पत्रकार महासङ्घ धनुषाका अध्यक्ष पुरन साहलगायत धनुषा जिल्लामा कार्यरत सञ्चारकर्मीहरूको उल्लेखनीय सहभागिता रहेको थियो।
कार्यक्रममा सहभागीहरूले पत्रकारिताको विश्वसनीयता अभिवृद्धि, व्यावसायिक क्षमता विकास तथा जिम्मेवार सञ्चार अभ्यासलाई थप प्रभावकारी बनाउने विषयमा अनुभव आदानप्रदान गरेका थिए।
Discussion about this post