धनुषा/असार ९ गते। नेपाली सेनाले आफ्नो सामाजिक उत्तरदायित्व अन्तर्गत जनकपुरधामस्थित मानव सेवा आश्रममा आश्रित असहाय तथा बेसहारा व्यक्तिहरूलाई भोजन तथा राहत सामग्री वितरण गरेको छ।
सैनिक–नागरिक सम्बन्धलाई थप सुदृढ बनाउने उद्देश्यले सञ्चालन गरिने विभिन्न सामाजिक कार्यक्रमअन्तर्गत श्री कालि सिद्ध दल गण (ई) ले आफ्नो आन्तरिक स्रोत–साधनबाट उक्त मानवीय सहयोग कार्यक्रम सम्पन्न गरेको हो।
कार्यक्रममा श्री मध्य पूर्वी पृतनाका पृतनापति उपरथी भुवन खत्रीको विशेष उपस्थितिमा कालि सिद्ध दल गण (ई) का गणपति प्रमुख सेनानी सुमित श्रेष्ठको कमाण्डमा खटिएको सेनाको टोलीले मानव सेवा आश्रममा आश्रित ६३ जना तथा १५ जना सहयोगी गरी कुल ७८ जनालाई एक छाक भोजन गराउनुका साथै आवश्यक राशन सामग्री हस्तान्तरण गरेको थियो।
कार्यक्रमका अवसरमा नेपाली सेनाले मानव सेवामा समर्पित संस्थाहरूसँग सहकार्य गर्दै समाजका विपन्न तथा असहाय वर्गलाई सहयोग पुर्याउने कार्यलाई निरन्तरता दिइरहेको जनाएको छ। यस्ता मानवीय गतिविधिले सैनिक–नागरिक सम्बन्धलाई अझ प्रगाढ बनाउनुका साथै समाजमा सहयोग, सद्भाव र सेवाभावको संस्कृतिलाई प्रवर्द्धन गर्ने विश्वास व्यक्त गरिएको थियो।
मानव सेवा आश्रमका पदाधिकारीहरूले नेपाली सेनाले प्रदान गरेको सहयोगप्रति आभार व्यक्त गर्दै यस्ता कार्यक्रमले आश्रममा आश्रित व्यक्तिहरूको दैनिक जीवनमा महत्वपूर्ण राहत पुग्ने बताएका छन्। नेपाली सेनाको यस पहललाई स्थानीयस्तरमा सकारात्मक र अनुकरणीय सामाजिक कार्यका रूपमा हेरिएको छ।
Discussion about this post