परोपकारले नै सभ्य समाज र समुन्नत राष्ट्र निर्माण हुन्छ : प्रदेश प्रमुख लाभ

धनुषा/जेठ ३० गते । मधेस प्रदेशका प्रदेश प्रमुख डा. सुरेन्द्र लाभले परोपकारी भावना र समाजसेवाको संस्कृतिबिना सभ्य नागरिक समाज तथा समुन्नत राष्ट्रको परिकल्पना गर्न नसकिने बताएका छन्।

मानव अधिकार तथा शान्ति समाजद्वारा जनकपुरधाममा आयोजित ‘कर्मयोगी बद्री पहाडी समाजसेवा पुरस्कार’ अर्पण कार्यक्रममा बोल्दै प्रदेश प्रमुख लाभले समाजमा सकारात्मक परिवर्तन ल्याउन परोपकारको भावना अत्यन्त आवश्यक रहेको बताए। उनले परोपकारी सोचले असल नागरिक निर्माण गर्नुका साथै राष्ट्रको समग्र विकासमा महत्वपूर्ण योगदान पुर्‍याउने धारणा व्यक्त गरे।

प्रदेश प्रमुख लाभले समाजसेवामा समर्पित व्यक्तित्वहरूलाई सम्मान गर्नुका साथै समाजसेवामूलक संस्थाहरूको संरक्षण, विकास र सुदृढीकरणका लागि सबै क्षेत्रबाट सहयोग र सहकार्य आवश्यक रहेको उल्लेख गरे। उनले परोपकारलाई मानव जीवनको सर्वोच्च धर्मको संज्ञा दिँदै समाज परिवर्तनका लागि निःस्वार्थ सेवाभावको आवश्यकता औंल्याए।

सोही अवसरमा मधेस प्रदेशसभा सदस्य ललिता दास तत्मालाई ‘कर्मयोगी बद्री पहाडी समाजसेवा पुरस्कार’ प्रदान गरिएको थियो। पुरस्कारस्वरूप उनलाई नगद एक लाख १० हजार रुपैयाँ, कदरपत्र तथा सम्मानपत्र प्रदान गरिएको आयोजकले जनाएको छ।

मानव अधिकार तथा शान्ति समाजकी सभापति रेणुका पौडेलको अध्यक्षतामा सम्पन्न कार्यक्रममा मधेस प्रदेशसभाका सदस्यहरू, विभिन्न सामाजिक संघसंस्थाका प्रतिनिधिहरू, साहित्यकार, पत्रकार तथा समाजसेवीहरूको उल्लेखनीय सहभागिता रहेको थियो।

कार्यक्रममा वक्ताहरूले समाजसेवामा योगदान पुर्‍याउने व्यक्तिहरूलाई सम्मान गर्ने परम्पराले नयाँ पुस्तालाई पनि सामाजिक उत्तरदायित्व र सेवाभावतर्फ प्रेरित गर्ने विश्वास व्यक्त गरेका थिए।