धनुषा/फागुन ७ गते। मोनाष्टिक इंगलिश बोर्डिङ स्कुलले विद्यार्थीहरूको समग्र विकासलाई लक्ष्य गर्दै एक दिने कला तथा साहित्य उत्सव सम्पन्न गरेको छ। विद्यालयले आयोजना गरेको उक्त उत्सवमार्फत विद्यार्थीहरूलाई आफ्नो सिर्जनात्मक क्षमता, अभिव्यक्ति र प्रतिभा प्रदर्शन गर्ने अवसर प्रदान गरिएको जनाएको छ।
विद्यालयका म्यानेजिङ डाइरेक्टर डा. सोनु साहका अनुसार कक्षा १ देखि ७ सम्मका विद्यार्थीहरू उत्सवमा सक्रिय रूपमा सहभागी भएका थिए। उनका अनुसार कार्यक्रमको मुख्य उद्देश्य विद्यार्थीहरूलाई पाठ्यपुस्तकमा मात्र सीमित नराखी नेपाली र अंग्रेजी भाषामा कला तथा साहित्यिक अभिव्यक्ति प्रस्तुत गर्ने वातावरण तयार गर्नु हो। साथै, स्थानीय भाषा मैथिली तथा सांस्कृतिक परम्पराप्रति लगाव बढाउन पनि उत्सवले टेवा पुर्याउने विश्वास व्यक्त गरिएको छ।
उत्सवका क्रममा विद्यार्थीहरूले मैथिली कला, परम्परागत पहिरन, स्थानीय भोजन, संस्कृति र साहित्यसम्बन्धी विविध प्रस्तुति दिएका थिए। कार्यक्रमले स्थानीय मौलिकता र सांस्कृतिक विविधताको झल्को दिएको थियो। धार्मिक तथा पौराणिक विषयवस्तुलाई समेत प्रस्तुतीकरणमा समेट्दै विद्यार्थीहरूले भगवान बुद्ध र सीतारामसँग सम्बन्धित स्थल तथा सांस्कृतिक सम्पदाबारे सिर्जनात्मक ढंगले जानकारी प्रस्तुत गरेका थिए।
डा. साहले यस्ता कार्यक्रमले विद्यार्थीहरूको शैक्षिक उपलब्धिसँगै मानसिक, सामाजिक र सांस्कृतिक विकासमा समेत सकारात्मक प्रभाव पार्ने बताए। उनका अनुसार किशोर–किशोरीमा घट्दो पठन संस्कृतिलाई पुनर्जीवित गर्न तथा कुलतबाट टाढा राख्न यस्ता सिर्जनात्मक र सहभागितामूलक कार्यक्रम प्रभावकारी हुन सक्छन्।
कार्यक्रममा विद्यार्थीका अभिभावक, स्थानीय साहित्यिक व्यक्तित्व तथा अन्य अतिथिहरूको उल्लेख्य उपस्थिति रहेको थियो। अभिभावकहरूले विद्यार्थीहरूको प्रस्तुति सृजनात्मक, प्रभावशाली र प्रेरणादायी भएको प्रतिक्रिया दिएका थिए। सहभागीहरूले विद्यालयले शिक्षासँगै सिर्जनात्मकता र संस्कृतिलाई जोड्ने प्रयास सराहनीय रहेको बताएका छन्।
विद्यालय प्रशासनका अनुसार आगामी दिनमा पनि विद्यार्थीहरूको प्रतिभा प्रस्फुटन, भाषा–साहित्यको प्रवर्द्धन तथा सांस्कृतिक चेतना अभिवृद्धि गर्ने उद्देश्यका यस्ता कार्यक्रमहरू निरन्तर आयोजना गरिनेछन्।
Discussion about this post