संघीयता जोगाउन सबै लाग्नुपर्छ : मुख्यमन्त्री यादव

धनुषा/श्रावण १८ गते । मधेश प्रदेशका मुख्यमन्त्री सरोजकुमार यादवले देशमा आएको संघीय व्यवस्थालाई सफल हुन नदिन विभिन्नखालका षडयन्त्र भइरहेको भन्दै त्यसलाई जोगाउन हामी सबैको सहयोगको खाँचो रहेको बताएको छ ।

शिक्षा तथा समाज कल्याण मन्त्रालय तथा निकायको आर्थिक वर्ष २०७९–८० को वार्षिक प्रगति समीक्षा गोष्ठीलाई बिहीबार जनकपुरधाममा सम्बोधन गर्दै उनले यस्तो बताएको हो ।

उनले भने, “जनताको छिटोछरितो काम हुनका लागि संघीयता आएको हो, यदि संघीयतामा पनि जनताले दुःख पायो भने संघीयताको अर्थ हुँदैन । त्यसैले यस्तो अवस्था आउन नदिनका लागि कर्मचारी गम्भीर हुनु आवश्यक छ ।’’

उनले शिक्षा क्षेत्रमा सुधारका लागि प्रदेश सरकारले सामाजिक विकास मन्त्रालयलबाट छुटाएर छुट्टै शिक्षा तथा समाज कल्याण मन्त्रालय बनाएको बताए ।

सरकारले शिक्षा क्षेत्रमा गरेको लगानी अनुसारको उपलब्धी प्राप्त नगरेको भन्दै उपलब्धी दिने किसिमले अगामी दिनमा कामकाज गर्न शिक्षा क्षेत्रका कर्मचारीलाई निर्देशन दिए । उनले काम गर्नेलाई सम्मान र नगर्नेलाई सजाय भन्ने अवधारणाका साथ सरकारकारले अगामी दिनमा कदम चाल्ने प्रष्ट पारे।

मधेश प्रदेशलाई शिक्षाको हव बनाउनु पर्ने भन्दै मधेशको शिक्षाको अवस्थामा सुधारका लागि देखिएका समस्या समाधानका लागि प्रदेश सरकार गम्भीर रहेको बताए । उनले शिक्षाको साथै खेलकुदलाई प्रदेश सरकारले प्राथमिकताका साथ अगाडि बढाइरहेको भन्दै प्रदेशको आठ वटै जिल्लामा रंगशाला निमार्णका लागि कामकाज अघि बढेको जानकारी दिए ।

उनले ११ औं राष्ट्रिय खेलकुद प्रतियोगिताको आयोजनाका लागि प्रदेश सरकारले कामकाजलाई अगाडि बढाएको भन्दै भारतीय प्रधानमन्त्री नरेन्द्र मोदीले जनकपुरधामका लागि घोषणा गरेको एक सय करोड जनकपुरधाममा निर्माणाधीन रामजानकी अन्तर्राष्ट्रिय रंगशाला निर्माणमा खर्चिने बताए ।

कार्यक्रममा शिक्षा तथा समाज कल्याणमन्त्री महेश यादवले शिक्षा क्षेत्रको सुधारका लागि सरकार प्रतिबद्ध रहेको भन्दै शिक्षामा सुधारका लागि सबैले आफनो दायित्व निर्वाह गर्नुपर्ने बताए ।

उनले आफनो दायित्व निर्वाह नगर्नेलाई छुट नहुने भन्दै शिक्षा कार्यक्रम कार्यान्वयनको क्रममा देखिएका समस्या समाधानका लागि मन्त्रालय तयार भएको बताए ।

कार्यक्रममा मधेश प्रदेशका प्रमुख सचिव किशोर चौधरीले यस प्रकारको समीक्षाले समस्या र चुनौतीको पहिचान हुने र अगामी दिनमा यसको समाधान गरी अघि बढ्न कर्मचारीलाई आग्रह गरे ।

शिक्षा तथा समाज कल्याण मन्त्रालयका सचिब लक्ष्मीप्रसाद भटट्राईको अध्यक्षतामा भएको सो कार्यक्रममा कृषि विश्वविद्यालय मधेश प्रदेशका उपकुलपति डा. बैद्यनाथ महतो, मधेश विश्वविद्यालयका उपकुलपति डा. दिपक शाक्य, मधेश प्रज्ञा प्रतिष्ठानका उपकुलपति रामभरोस कापरीसहितकाले आप्,नो धारणा रखोका थिए । गोरखापत्र बाट