मधेस प्रदेश : अन्तत: रामजी राम एमबीबीएस उतिर्ण भई बनेरै छाडे डाक्टर

जेठ २० गते। रामजी राम अन्ततः एमबीबीएस उत्तीर्ण भएका छन्। रामजी राम तिनै मेडिकल विद्यार्थी हुन्, जसले कलेजको शुल्क तिर्न नसक्दा परीक्षा दिन पाएका थिएनन्।

रौतहटको गढीमाई नगरपालिका–९ घर भएका रामजी रामले  
जनवरी २०२० मा नेसनल मेडिकल कलेज, वीरगञ्जका मेडिकल विद्यार्थी रामजी राम आफ्नो चौथो र अन्तिम वर्षको परीक्षाका लागि तयार थिए। उनी डाक्टर हुने कुरामा उनको परिवारलगायत सबैजना खुशी थिए।

तर, त्यो खुशी धेरै समय टिक्न पाएन। किनभने उनले कलेजले तोकेको शुल्क समयमै तिर्न नपाएको कारण परीक्षाबाट वञ्चित हुनुपर्‍यो।तेस्रो वर्षमा रामजीलाई पनि त्यस्तै भएको थियो, त्यसपछि उनले शुल्क तिर्न र परीक्षामा बस्न आवाज उठाउनुपर्‍यो।

रामजीको मुद्दा एक्लो थिएन। एमबीबीएस पढ्ने प्रयास गरेका अन्य धेरै दलित समुदायका विद्यार्थीसँग यस्तो भएको छ। धेरैले बैंकबाट ऋण लिएका छन्, कसैले रामजीजस्तै आवाज उठाएका छन् भने कोही आशा गुमाएर घर फर्केका छन्।

सीमान्तकृत समुदायका यी विद्यार्थीहरूले अध्ययनका लागि सरकारी सहायता पाए पनि उनीहरूको डिग्रीसम्मको यात्रा व्यक्तिगत आघात र कठिनाइले भरिएको हुन्छ।

रामजी रामले बिहीबार फेसबुकमार्फत आफूले एमबीबीएस उत्तीर्ण भएको जानकारी दिएका हुन्। उनले लेखेका छन्, ‘बुवा अन्ततः म पास भएँ । आजसम्मको परीक्षा यात्रामा प्रत्यक्ष-अप्रत्यक्ष रूपमा साथ दिनु हुने सम्पुर्ण गुरुहरू , परिवार, इष्टमित्र एवम् यो यात्राभरि साथ दिने कलेज तथा मिडियाकर्मीलगायत अप्ठ्यारो परिस्थितिमा साथ दिनुहुने महानुभावहरू प्रति हार्दिक हार्दिक आभार प्रकट गर्दछु।’

पढ्ने बेला पाएको सास्ती

एमबीबीएस चौथो वर्षमा पुग्दा समेत कलेजले अतिरिक्त शुल्क मागेर उनलाई हैरान पारेको थियो ।

चिकित्सा शिक्षासम्बन्धी राष्ट्रिय नीति तर्जुमा उच्चस्तरीय कार्यदलको प्रतिवेदन २०७२ मा छात्रवृत्ति पाएका विद्यार्थीसँग परीक्षा, काउन्सिल, भर्ना, पुस्तकालय, प्रयोगशाला आदि लिन नपाइने उल्लेख छ । यो व्यवस्थालाई तत्कालीन मन्त्रिपरिषदको सामाजिक विकास समितिको ०७२ भदौ ३१ गते बसेको बैठकले स्वीकार गरेको छ ।

चिकित्सा शिक्षा आयोगले ०७७ पुस २६ गते नेशनल मेडिकल कलेजलाई पत्राचार गर्दै रामजी रामको शुल्क विश्वविद्यालय अनुदान आयोगले तिरिसकेको भन्दै परीक्षामा सामेल गराउन भनेको थियो ।

चौथो वर्षमा समेत कलेजले वार्षिक शुल्क ५ लाख ९८ हजार ५० रुपैयाँ, होस्टल शुल्क ५५ हजार ४ सय २१ रुपैयाँ, खाना खर्च २ लाख १० हजार ३ सय १९ रुपैयाँ र इन्टरनेटको ९ हजार ८ सय रुपैयाँ तिर्न बाँकी देखाएको थियो । उनले आफूले अतिरिक्त शुल्क नतिर्ने अडान राखेपछि कलेजले फारम भर्न रोक लगाएको थियो । अतिरिक्त पैसा नतिरेकै कारण उनलाई कलेजले परीक्षा हलबाट बाहिर समेत निकालिदिएको थियो ।

सरकारले २०७२ को बजेट वक्तव्यमा अति विपन्न समुदायका डोम, मुसहर, चमार र वादी विद्यार्थीलाई मेडिकल र इन्जिनियरिङमा छात्रवृत्ति दिने व्यवस्था गरेको थियो । सोही छात्रवृत्ति पाएर रामजी नेशनल मेडिकल कलेजमा भर्ना भएका थिए ।

कलेजले कानुन विपरीत अतिरिक्त शुल्क मागेपछि रामजी लगायत छात्रवृत्तिमा अध्ययनरत अन्य विद्यार्थीले सामाजिक सञ्जाल र विभिन्न सञ्चार माध्यम मार्फत आवाज उठाउँदै आएका थिए ।

उनले कठिन परिस्थितिलाई पार गरेर एमबीबीएस उत्तीर्ण हुन सफल भएकोमा खुशी व्यक्त गरे । ‘धेरै बाधा आयो, परीक्षा दिँदादिँदै पनि कठिन परिस्थिति आयो । नीति मिल्दा मिल्दै पनि नियत विग्रेका कारणले कष्टकर भयो,’ उनले भने, ‘सकिने होला कि भन्ने खालको परिस्थिति पनि बन्थ्यो । तर एक न एक दिन पास हुन्छु भन्ने विश्वास थियो, त्यसैले काम गर्यो । अप्ठेरो परेको बेला हिम्मत र साथ दिने मानिसहरु पनि भेटिए ।’

आमा–बुवालाई छोरोले के पढ्दैछ, कसरी पढ्दैछ समेत थाहा नभएको अवस्थालाई टाढाबाट हेर्दा आफैंलाई अजिब लागे पनि दुःख कठिन परिस्थिति सधैं रहँदैन, आत्तिनु हुँदैन भने सिकाइ मिलेको उनको भनाइ छ ।

‘कागजी परीक्षा सकियो, चिकित्सक जीवनको मुख्य परीक्षा अब शुरु हुन्छ । हरेक पल परीक्षाहरु आउँदैछ । पढेर मात्रै हैन अब परेर जान्नुपर्छ,’ उनले भने ‘त्यसका लागि मनस्थिति तयार गरिरहेको छु ।’