वडा अध्यक्षद्वारा एकल महिलालाई यौ न प्रस्ताव राखेको आरोप (हेर्नुहोस भिडियो सहित)

सत्येन्द्र प्रताप सिंह/रौतहट । रौतहटको बृन्दावन नगरपालिका वडा नं. ७ का वडा अध्यक्ष मदन पालमाथि गाउँकै एक एकल महिलालाई पटक–पटक यौ न प्रस्ताव राख्दै आएको आरोप लागेको छ । वडा अध्यक्ष पालकै छिमेकी एक एकल महिलाले यस्तो आरोप लगाएकी हुन् । 

वडा अध्यक्ष पालले साना किसान कृषि सहकारी संस्थाबाट निकालेको ऋण र प्रहरीमा परेको मुद्दा मिलाइदिन्छु भन्दै यौन प्रस्ताव गर्ने गरेको धमैराकी ती महिलाले आरोप लगाएकी छन् ।

६ वर्षअघि साना किसान कृषि सहकारी संस्था धमैराबाट घर परिवार चलाउन ती महिलाका श्रीमानले ३ लाख रुपैयाँ कर्जा लिएका थिए । धमैरामा १३ धुर जग्गामा घर बनाएर बसोबास गर्दै आएको जग्गा साना किसान कृषि सहकारी संस्थामा धरौटी राखेर ऋण लिएको पाँच वर्षपछि श्रीमानको मृत्यु भएको ती महिला बताउँछिन् ।

अहिले सो ऋण ब्याज र सावासहित पाँच लाख पुगेको उनले बताइन् । उनका अनुसार वडा अध्यक्ष पालले नै त्यसबेला साना किसानबाट ऋण निकाल्न सहयोग गरेका थिए । अन्दाजी ३५ वर्षीया ती महिलाले सञ्चारकर्मीहरुसँग कुरा गर्दै गाउँको जेठाजुसमेत पर्ने वडा अध्यक्ष पालले ऋण मिनाहा गराइदिने र मुद्दा मिलाइदिने भन्दै रातिको ११, १२ बजेतिर आफूलाई भेट्न बोलाउने गरेको आरोप लगाइन् ।

करिब ६५ वर्षीय वडा अध्यक्ष पालले आफूले बोलाएको ठाउँमा नआएमा विभिन्न बहाना बनाएर धम्कीसमेत दिने गरेको ती महिलाले बताइन् ।

वडा अध्यक्ष पालले नै गाउँकी एक छिमेकीसँग समान्य वादविवाद हुँदा छिमेकीको बुहारी पर्नेको गर्भपतन भएको भन्दै प्रहरीमा ७ लाख बिगो दाबी गर्दै उजुरी दिन लगाएको उनले बताइन् । सो समय आफूलाई थुनामा समेत राखेपछि नातामा नाति पर्नेले ९० हजार धरौटीमा छुटाएर ल्याएको र वडा अध्यक्ष पालले झुक्याएर आफू र श्रीमानसँग पनि ३ लाखको कपाली तमसुक कागज बनाएको ती महिलाले आरोप लगाइन् । 

जसोतसो श्रम गरेर चार जना बालबच्चा हुर्काइरहेकी ती महिलालाई वडा अध्यक्ष पालले अहिले सोही तमसुकको आधारमा घर खाली गर्नसमेत दबाब दिने गरेको आरोप लगाइन् । 

गत स्थानिय तहको निर्वाचनमा नेकपा एकीकृत समाजवादीबाट निर्वाचित वडा अध्यक्ष पालले होटलमा जानसमेत प्रस्ताव गर्ने गरेको ती महिलाको आरोप छ । वडा अध्यक्ष पालले आफूसँग यौन सम्बन्ध नराखे बलात्कार गरेर मर्ने धम्कीसमेत दिने गरेको ती महिलाको आरोप छ ।

 तर यस विषयमा वडाअध्यक्ष पालसँग बुझ्दा यो आरोप गलत रहेको बताएका छन् । आफूलाई बद्नाम गर्नका लागि यस्तो आरोप लगाइएको वडा अध्यक्ष पालको भनाइ छ ।

उनले आफूले ती महिलालाई फोनसमेत नगरेको दाबी गरे । वडा अध्यक्ष पालले भने, ‘यो कसैले षड्यन्त्र गरेर मलाई फसाउने प्रयास गरेको हो ।’ आफू ती महिलासँग कहिले पनि नबोलेको समेत उनले दाबी गरे । साभार स्रोत-मध्याह्न अनलाईन बाट

हेर्नुहोस भिडियो