पुस २५ गते। शिक्षक सेवा आयोगले माध्यमिक तह तृतीय श्रेणीका लागि विज्ञापन आह्वान गरेको छ । आयोगले चालू शैक्षिक सत्रका लागि ६८६ सिटका लागि विज्ञापन आह्वान गरेको हो । आयोले आफ्नो वार्षिक कार्यतालिका अनुसार शिक्षक पदपूर्तिका लागि विज्ञापन आह्वान गरेको हो ।
आयोगले गत वर्षको रिक्त ३७० दरबन्दी र नयाँ ३१६ दरबन्दी थप गरी ६८६ दरबन्दी पदपूर्तिका लागि विज्ञापन गरेको हो । आयोगले नेपाली विषयका लागि १११ सिटमा विज्ञापन आह्वान गरेको छ । त्यस्तै अंग्रेजीका लागि ८४, गणितका लागि २०८, विज्ञानका लागि १९१, सामाजिक अध्ययनका लागि ५४, अर्थशास्त्रका लागि ८, कार्यालय सञ्चालन तथा लेखाका लागि १५, शिक्षाका लागि १, स्वास्थ्य शिक्षाका लागि १, शुक्लयजुर्वेदका लागि १, संस्कृत व्याकरण ३, संस्कृतभाषा ७, कम्प्युटर विज्ञान १, संस्कृत साहित्य १ गरी ६८६ पदका लागि विज्ञापन आह्वान गरेको हो ।
उम्मेदवारहरूले आयोगको अनलाइन दरखास्त प्रणाली https://online.tsc.gov.np/ मार्फत सम्पूर्ण विवरणहरू भरी दरखास्त दिनुपर्नेछ ।
विज्ञापनको विस्तृत विवरण आयोगको वेबसाइट https://tsc.gov.np डाउनलोड / सूचना/विज्ञापन तबद बाट प्राप्त गर्न र हेर्न सकिने जनाएको छ ।
यहाँबाट दरखास्त पेस गर्न सकिन्छ : https://online.tsc.gov.np/ र https://tsc.gov.np/
परीक्षा लिखित र अन्तर्वार्ता गरी दुई किसिमले हुनेछ । लिखितमा सामान्य र विषयगत परीक्षा हुनेछ । यी दुवै परीक्षामा छनौटमा परेकालाई मात्र अन्तर्वार्तामा सहभागी गराइनेछ । दरखास्त माघ २४ गतेसम्म बुझाउन सकिनेछ । भने फागुन २ गतेसम्म दोब्बर दस्तुर तिरेर दरखास्त दिन सकिनेछ । लिखित परीक्षा सामान्य तर्फ चैत १८ गते हुनेछ । विषयगत परीक्षाको मिति सामान्य परीक्षाको नतिजा प्रकाशनपछि मात्रै तोकिनेछ । यो विज्ञापनको प्रतिस्पर्धा र छनौट प्रदेशस्तरमा हुनेछ । परीक्षा केन्द्रमा प्रदेश १ को मोरङ, मधेश प्रदेशको धनुषा, बागमती प्रदेशको मकवानपुर, गण्डकी प्रदेशको कास्की, लुम्बिनी प्रदेशको दाङ, कर्णाली प्रदेशको सुर्खेत र सुदूरपश्चिमको कैलालीमा हुनेछ ।
उम्मेदवारी दिनका लागि मान्यता प्राप्त शिक्षण संस्थाबाट सम्बन्धित विषयमा स्नातक तह वा सो सरहको परीक्षा (कम्तिमा ३०० पूर्णाङ्क वा १२ क्रेडिट आवर) उत्तीर्ण गरी शिक्षा विषयमा कम्तीमा १० महिने तालिम पूरा गरेको हुनुपर्नेछ । तर, अंग्रेजी, गणित, विज्ञान, कार्यालय सञ्चालन तथा लेखा र कम्प्युटर विषयको हकमा तालिम नलिए पनि विज्ञापन बमोजिम शिक्षक पदको लागि उम्मेद्वार हुन पाउनेछन् । माध्यमित तहको स्थायी अध्यापन अनुमतिपत्र प्राप्त गरेको हुनुपर्नेछ ।
Discussion about this post