म्यादी प्रहरीको तलब ३० हजार माथि, १ लाख म्यादी प्रहरी भर्ना गरिने

काठमाण्डौं । स्थानीय तहको निर्वाचन गराउन १ लाख म्यादी प्रहरी भर्नाकालागि अर्थले स्वीकृति दिएको छ । प्रहरी प्रधान कार्यालयले १ लाख १८ हजार म्यादी चाहिने प्रस्ताव गरेको भएतापनि अर्थले १ लाखका लागि मात्र आवश्यक बजेट निकासा दिने भएको हो।

२०७९ वैशाख ३० मा हुने स्थानीय निर्वाचनमा सरकारले ४० दिनका लागी म्यादी प्रहरीलाई भर्ना लिने भएको छ । चैतको पहिलो साता दरखास्त आह्वान गर्नेगरी तयारी भइरहेको छ । म्यादी प्रहरीले जवान सरह तलव र रासन बापत थप ७ हजार पाउँनेछन ।

म्यादी प्रहरी नियुक्ति गर्ने मापदण्ड गृह मन्त्रालयबाट स्विकृत हुन नै बाँकी छ । मापदण्ड स्विकृत भएपछि दरखास्त लिएर चैत २८ बाट म्यादी नियुक्त गर्ने प्रहरी प्रधान कार्यालयले तयारी गरेको छ । म्यादी प्रहरी २०७९ वैशाख ३० मा चुनाव भएपछि थप एक साता सेवामा रहनेछन् ।

चुनावमा खटिने म्यादीले ४० दिन काम गरेपछि ३० हजार २ सय ८० रुपैयाँ तलब पाउँछन् । रासन बापत उनीहरुलाई ७ हजार उपलब्ध गराउने कार्यविधि तयार गरिएको छ । उनीहरुलाई ६ हजार बराबरको लत्ता कपडा र १ हजार गाडी भाडा दिइने छ । दुई जोर जुत्ता, मोजा, झुल र स्ल्पिङ ब्याग उपलब्ध गराउने कार्यविधि तयार भैरहेको छ । रासन र कपडा सहित एकजना म्यादी प्रहरीका लागी राज्य कोषको ४४ हजार ४ सय ८० रुपैयाँ खर्च हुनेछ ।

१ लाख म्यादी प्रहरीका लागि करिब साढे ४ अर्ब खर्च हुने अनुमान छ । एक साताको तालिम चलाउन १ करोड ५४ लाख खर्च हुने आकलन गरिएको छ । कुन जिल्लामा कत्ति म्यादी चाहिन्छ भन्ने मतदान केन्द्र अनुसार तय हुनेछ ।