सप्तरीमा कोरोना संक्रमणबाट थप दुई जनाको मृत्यु

सप्तरी।सप्तरीमा कोरोना संक्रमणबाट थप दुई जना पुरुषको मृत्यु भएको छ । योसँगै सप्तरीमा कोरोना संक्रमणबाट मृत्यु हुनेको संख्या २९ पुगेको छ । सप्तरीको हनुमाननगर कंकालिनी नगरपालिका–६ जोगिनिया घर भएर विराटनगर बस्दै आएका ५८ वर्षीय पुरुषको कोरोना संक्रमणबाट मृत्यु भएको उनका परिवारका सदस्य दीपक मण्डलले जानकारी दिए ।विराटनगरको जनपथ टोलस्थित जनपथ माविमा शिक्षण पेशामा कार्यरत उनलाई ज्वरोका साथै टाउको दुखेपछि विराटनगरस्थित विराट नर्सिङ होममा भर्ना गरिएको थियो । 

कोरोना परीक्षणको रिपोर्ट पोजेटिभ आएपछि शनिबार विराटनगरमै न्यूरो अस्पतालमा रेफर गरिएकोमा उपचारका क्रममा मृत्यु भएको मण्डलले जानकारी दिए । मण्डलका अनुसार विराटनगर–१२ मङगलबारे हाटमा बसोबास गर्दै आएका उनको शव विराटनगरस्थित हाटखोलामा नेपाली सेनाले व्यवस्थापन गरेको छ । लामो समयदेखि मधुमेह र उच्च रक्तचापबाट पीडित उनको मिर्गौलासमेत खराबी भएको थियो । 

यसैगरी, धरानस्थित बीपी कोइराला स्वास्थ्य विज्ञान प्रतिष्ठानमा कार्यरत रेडियोग्राफर सप्तरीको महादेवा गाउँपालिका–५ घर भएर सुनसरीको धरान–१८ बस्ने ३० वर्षीय पुरुषको मृत्यु भएको छ । 

स्वास्थ्यमा समस्या देखिएपछि तत्कालै प्रतिष्ठानको आकस्मिक कक्षमा भर्ना गरिएका उनको सोमबार कोरोना संक्रमण पुष्टि भएको र मृत्यु भएको प्रतिष्ठानका सहप्रवक्ता डा. आशिष श्रेष्ठले जानकारी दिए ।

मृतकको शव सप्तरीको आफ्नै गाउँमा नेपाली सेनाले व्यवस्थापन गरेको जिल्ला स्वास्थ्य कार्यालय सप्तरीका निमित्त प्रमुख दुनियालाल यादवले जानकारी दिए ।

यादवका अनुसार सप्तरीमा मृत्यु हुनेको सङ्ख्या २९ पुगेको छ । हालसम्म १ हजार ६३१ जना संक्रमित भएकोमा १४ सय जना निको भएको बताएका यादवले सप्तरीमा हाल २ सय २ जना सक्रिय संक्रमित रहेको जनाए । 

होम आइसोलेशनमा १ सय ७९ जना रहेकोमा संस्थागत आइसोलेशनमा अहिले २३ जना मात्र रहेको यादवले जानकारी दिए ।

साभार-अन्नपूर्णापोस्ट बाट