विश्वको सबैभन्दा व्यस्त विमानस्थल बन्द हुने प्रक्रियामा

दुबई/साउन १९ गते। विश्वकै व्यस्त विमानस्थलहरूमध्ये एक दुबई अन्तर्राष्ट्रिय विमानस्थलआगामी वर्षहरूमा स्थायी रूपमा बन्द हुने भएको छ ।

प्राप्त जानकारी अनुसार, सन् २०३५ सम्ममा सो बिमानस्थलको सञ्चालन पूर्ण रूपमा बन्द हुनेछ र सबै उडानहरू अल मक्तुम अन्तर्राष्ट्रिय विमानस्थलमा सारिने छन्। यो स्थानान्तरण प्रक्रिया चरणबद्ध रूपमा हुने अपेक्षा गरिएको छ, जुन सम्भवतः सन् २०३२ को आसपास सुरु हुनेछ। यात्रु वा वायुसेवा कम्पनीहरूलाई कुनै असुविधा नहोस् भन्ने सुनिश्चित गर्न यो सम्पूर्ण प्रक्रिया पूरा हुन केही वर्ष लाग्न सक्छ।

दुबई साउथमा अवस्थित अल मक्तुम अन्तर्राष्ट्रिय विमानस्थलको करिब २८ अर्ब पाउन्डको लागतमा व्यापक विस्तार गरिँदै छ। यस परियोजनाको उद्देश्य यसलाई विश्वकै सबैभन्दा ठूलो र अत्याधुनिक विमानस्थलमा रूपान्तरण गर्नु हो। दुबई अन्तर्राष्ट्रिय विमानस्थलले विगत ६ दशकदेखि विश्वव्यापी उड्डयन क्षेत्रमा महत्त्वपूर्ण भूमिका निर्वाह गर्दै आएको छ।

अन्तर्राष्ट्रिय यात्रुहरूको संख्याका आधारमा यो लामो समयदेखि विश्वका व्यस्त विमानस्थलहरूमध्ये एक रहँदै आएको छ। नयाँ विमानस्थल पूर्ण रूपमा सञ्चालनमा आएपछि दुबईले विश्वव्यापी उड्डयन केन्द्रका रूपमा आफ्नो स्थिति अझ सुदृढ पार्नेछ। हवाई यात्राको भविष्यको माग पूरा गर्न ‘अल मक्तुम अन्तर्राष्ट्रिय विमानस्थल’ले निकै ठूलो क्षमता र अत्याधुनिक सुविधाहरू प्रदान गर्ने विश्वास अधिकारीहरूले लिएका छन्।