कालो जिन्सको रंग उडेर हैरान हुनुहुन्छ, उसो भए रोक्ने याे छ उपाय

काठमाडौं/साउन १४ गते। फेसन र स्टाइलको कुरा गर्दा कालो जिन्स लगभग जुनसुकै टप, सर्ट वा टी सर्टसँग सहजै सुहाउँछ।

तर, समस्या तब आउँछ जब तपाईंको त्यो मनपर्ने कालो जिन्सको रङ खुइलिन थाल्छ। बारम्बार धुने बानी र कडा तथा रसायनयुक्त डिटर्जेन्टको प्रयोग नै प्रायः यसका मुख्य कारण हुन्।

खुसीको कुरा के छ भने, धुने र सुकाउने क्रममा केही महत्त्वपूर्ण कुराहरूमा ध्यान दिएर तपाईं यसको रङ खुइलिनबाट बचाउन सक्नुहुन्छ। यहाँ केही महत्त्वपूर्ण सुझावहरू दिइएका छन्, जसलाई अपनाएर तपाईं आफ्नो कालो जिन्सको रङ लामो समयसम्म कायम राख्न सक्नुहुन्छ।

बारम्बार नधुनुहोस्ः

कालो जिन्सको रङ उड्न नदिन यसलाई आवश्यक पर्दा मात्र धुनुहोस्। मेसिन वा हातले पटक पटक धुँदा यसको रङ निकै छिटो उड्न सक्छ। साथै, जिन्सलाई नयाँ स्तै राख्न ‘स्पट क्लिनिङ’को तरिका अपनाउनुहोस् अर्थात्, फोहोर भएको निश्चित भाग मात्र सफा गर्नुहोस्।

धेरै ब्रस हानिकारकः

आफ्नो जिन्सलाई हातले मात्र र चिसो पानी प्रयोग गरेर धुनुहोस्। साथै, यसलाई जोडले नघोट्नु होस् वा धेरै ब्रसको प्रयोग नगर्नुहोस्। धेरै डिटर्जेन्टको प्रयोग पनि नगर्नुहोस् किनकि यसमा हुने रसायनहरूले जिन्सको रङ खुइल्याउन सक्छन्।

उल्टो पारेर धुनेः

जिन्सलाई कहिल्यै पनि सुल्टो पारेर नधुनु होस्। चिसो पानीमा हाल्नु अघि सधैं तिनलाई उल्टो पार्नुहोस्। साथै, तातो पानीमा धुनबाट पनि बच्नुहोस् किनकि यसले रङ छिट्टै उड्न सक्छ।

कसरी सुकाउने ?

धोइसके पछि जिन्सलाई कहिल्यै पनि जोडले ननिचोर्नुहोस् । साथै, तिनलाई कडा घाममा सिधै सुकाउनबाट पनि बच्नुपर्छ किनकि यसले रङ खुइल्याउन सक्छ। यसको सट्टा जिन्सलाई हावा आवतजावत हुने छायाँ परेको ठाउँमा सुकाउनु होस्।