मिटरब्याजको पिडितको जनकपुरधाममा प्रदर्शन, पक्राउ परेका तीन जनामाथि कडा कारबाहीको माग

जनकपुरधाम/साउन १ गते । मिटरब्याजको आरोपमा पक्राउ परेका तीन जनामाथि निष्पक्ष अनुसन्धान गरी कानुनबमोजिम कडा कारबाही गर्न माग गर्दै मिटरब्याज पीडितहरूले शुक्रबार जनकपुरधाममा विरोध प्रदर्शन गरेका छन्।

धनुषा प्रहरीले जनकपुरधाम उपमहानगरपालिका–१६ निवासी हरेराम साह, उनकी आमा रेखाकुमारी साह तथा काका गोपाल साहलाई मिटरब्याजसम्बन्धी आरोपमा पक्राउ गरेपछि पीडितहरू न्यायको मागसहित सडकमा उत्रिएका हुन्।

प्रदर्शनकारीहरूले जिल्ला प्रशासन कार्यालय, जिल्ला प्रहरी कार्यालय तथा जिल्ला अदालत धनुषाको परिसर अगाडि धर्ना दिँदै पक्राउ परेका आरोपितहरूलाई कुनै पनि बहानामा उन्मुक्ति नदिन र निष्पक्ष छानबिनमार्फत कानुनी कारबाही अघि बढाउन आग्रह गरेका छन्।

पीडितहरूको दाबीअनुसार पक्राउ परेका व्यक्तिहरू लामो समयदेखि मिटरब्याजको अवैध कारोबारमा संलग्न रही सर्वसाधारणलाई अत्यधिक ब्याजमा ऋण उपलब्ध गराउने, उनीहरूको सम्पत्ति हडप्ने तथा आर्थिक शोषण गर्ने कार्यमा सक्रिय रहेका थिए।

उनीहरूले पक्राउ परेका तीन जनामात्र नभई मिटरब्याजको अवैध कारोबारमा संलग्न अन्य व्यक्तिहरूको समेत पहिचान गरी अनुसन्धानको दायरामा ल्याउन र कानुनअनुसार कारबाही गर्न सरकारसँग माग गरेका छन्।