जनकपुरधामका सबै विद्यालयमा कक्षा १–८ सम्म मैथिली माध्यमको स्थानीय पाठ्यक्रम अनिवार्य

धनुषा/असार २१ गते । जनकपुरधाम उपमहानगरपालिकाले स्थानीय इतिहास, भाषा, कला, संस्कृति तथा सम्पदामा आधारित स्थानीय पाठ्यक्रम आगामी शैक्षिक सत्रदेखि कक्षा १ देखि ८ सम्मका सामुदायिक तथा संस्थागत विद्यालयमा अनिवार्य रूपमा लागू गर्ने भएको छ।

शुक्रबार आयोजित कार्यक्रममा पाठ्यक्रमका लेखक डा. हेमप्रसाद साहले उक्त पाठ्यक्रम जनकपुरधाम उपमहानगरपालिकाका नगरप्रमुख मनोजकुमार साहलाई औपचारिक रूपमा हस्तान्तरण गरेका हुन्।
पाठ्यक्रम हस्तान्तरणपछि नगरप्रमुख साहले कक्षा १ देखि ८ सम्मका सबै विद्यालयमा मैथिली भाषामार्फत स्थानीय पाठ्यक्रम अनिवार्य विषयका रूपमा अध्यापन गराइने जानकारी दिए। उनका अनुसार यस पाठ्यक्रमले विद्यार्थीलाई आफ्नै समाज, भाषा, संस्कृति, परम्परा तथा धार्मिक एवं ऐतिहासिक सम्पदाबारे तथ्यपरक र व्यवहारिक ज्ञान प्रदान गर्नेछ। साथै, आफ्नै पहिचान, संस्कृतिप्रति अपनत्व र संरक्षणको भावना विकास गर्न पनि महत्वपूर्ण योगदान पुग्ने विश्वास व्यक्त गरे।

स्थानीय पाठ्यक्रममा जनकपुरधामको ऐतिहासिक, धार्मिक तथा सांस्कृतिक सम्पदा, स्थानीय भाषा, साहित्य, कला, चाडपर्व, सामाजिक मूल्य–मान्यता, प्राकृतिक सम्पदा तथा स्थानीय जीवनशैलीसम्बन्धी विषय समावेश गरिएको छ। यसले स्थानीय ज्ञान, सीप र सांस्कृतिक सम्पदाको संरक्षण तथा प्रवर्द्धनमा टेवा पुग्ने अपेक्षा गरिएको छ।

स्थानीय पाठ्यक्रम मस्यौदा तथा लेखन समितिको संयोजक अञ्जु पाण्डे रहेकी थिइन्। समितिमा श्यामसुन्दर शशि, सुनिल मल्लिक र विनिता ठाकुरले विज्ञ सदस्यका रूपमा योगदान दिएका थिए।
उपमहानगरपालिकाले स्थानीय सरकार सञ्चालन ऐन तथा राष्ट्रिय पाठ्यक्रम विकास तथा मूल्याङ्कन परिषद्को व्यवस्था अनुरूप स्थानीय आवश्यकता, पहिचान र मौलिकतालाई केन्द्रमा राखेर पाठ्यक्रम तयार गरिएको जनाएको छ।

उपमहानगरपालिकाको यो पहलले जनकपुरधामको मौलिक इतिहास, भाषा, कला र संस्कृतिलाई विद्यालय शिक्षासँग जोड्दै भावी पुस्तामा यसको संरक्षण र हस्तान्तरण गर्न महत्वपूर्ण भूमिका खेल्ने अपेक्षा गरिएको छ।