लायन्स क्लब जनकपुरधाम र गार्गीको ह्यान्डओभर–टेकओभर कार्यक्रम सम्पन्न

गिरिजानन्द साह/जनकपुरधाम/असार १९ गते। लायन्स क्लब अफ जनकपुरधाम र लायन्स क्लब अफ जनकपुरधाम गार्गीको ह्यान्डओभर–टेकओभर (नेतृत्व हस्तान्तरण) कार्यक्रम जनकपुरधाममा सम्पन्न भएको छ। कार्यक्रममा दुवै क्लबका नवनिर्वाचित पदाधिकारीलाई औपचारिक रूपमा जिम्मेवारी हस्तान्तरण गरिएको हो।

कार्यक्रममा लायन्स क्लब अफ जनकपुरधामका वर्ष २०२४/२५ का अध्यक्ष डा. राजेश साहले वर्ष २०२६/२७ का अध्यक्ष प्रसुन्न झालाई अध्यक्षीय चेन लगाइ क्लबका सम्पूर्ण कागजात तथा सामग्री हस्तान्तरण गरे। त्यसैगरी, लायन्स क्लब अफ जनकपुरधाम गार्गीका वर्ष २०२४/२५ का अध्यक्ष सरिता साहले वर्ष २०२६/२७ का अध्यक्ष सुनिता मिश्रालाई अध्यक्षीय चेन लगाई क्लबका सम्पूर्ण कागजात तथा सामग्री हस्तान्तरण गरिन्।

लायन्स क्लब अफ जनकपुरधामको वर्ष २०२६/२७ का लागि अध्यक्षमा प्रसुन्न झा, फर्स्ट भाइस प्रेसिडेन्टमा रामकिशोर साह, सेकेन्ड भाइस प्रेसिडेन्टमा डा. अनिल अग्रवाल, सचिवमा लक्ष्मीनारायण शाह तथा कोषाध्यक्षमा रामजीवन शाह निर्वाचित भएका छन्।

त्यस्तै, लायन्स क्लब अफ जनकपुरधाम गार्गीको वर्ष २०२६/२७ का लागि अध्यक्षमा सुनिता मिश्रा, फर्स्ट भाइस प्रेसिडेन्टमा सरिता कुमारी शाह, सेकेन्ड भाइस प्रेसिडेन्टमा जमुना कुमारी भुजेल, सचिवमा किरणदेवी गुप्ता तथा कोषाध्यक्षमा ममता सिंहानिया निर्वाचित भएकी छन्।

नवनिर्वाचित अध्यक्ष प्रसुन्न झाले लायन्स क्लबले विगतदेखि सञ्चालन गर्दै आएका सामाजिक सेवा तथा मानवीय कार्यलाई आगामी दिनमा अझ प्रभावकारी रूपमा निरन्तरता दिने प्रतिबद्धता व्यक्त गरे। उनले क्लबको गौरवपूर्ण इतिहासलाई कायम राख्दै आगामी कार्यक्रमहरू सफल बनाउन सबै सदस्य तथा शुभेच्छुकको साथ, सहयोग र सक्रिय सहभागिता आवश्यक रहेको बताए।

उनले विशेषगरी आगामी ‘गोल्डेन जुब्ली’ कार्यक्रमलाई भव्य र ऐतिहासिक रूपमा सम्पन्न गर्न सबैको सक्रिय सहयोगको अपेक्षा रहेको उल्लेख गरे।

कार्यक्रममा क्लबका पूर्वअध्यक्षहरूले नवनिर्वाचित पदाधिकारीलाई बधाई तथा शुभकामना व्यक्त गर्दै सफल कार्यकालको कामना गरेका थिए। वक्ताहरूले लायन्स क्लबले समाजसेवा, स्वास्थ्य, शिक्षा तथा मानवीय क्षेत्रमा पुर्‍याएको योगदानको प्रशंसा गर्दै आगामी दिनमा अझ प्रभावकारी भूमिका निर्वाह गर्न आग्रह गरे।

निवर्तमान अध्यक्ष डा. राजेशकुमार शाहले आफ्नो कार्यकालमा साथ, सहयोग र समर्थन गर्ने सम्पूर्ण सदस्य, शुभेच्छुक तथा सहयोगीप्रति आभार व्यक्त गर्दै नवनिर्वाचित कार्यसमितिलाई सफल कार्यकालको शुभकामना दिए।

कार्यक्रममा लायन्स क्लब अफ जनकपुरधामका ऋषिकेश साह,पुर्व अध्यक्षहरु मनिष रमण साह,रामबाबू गुप्ता,विध्याकर प्रसाद साह, लायन्स क्लब अफ जनकपुरधाम गार्गीका पदाधिकारीहरु, लियो क्लब अफ जनकपुरधामका पदाधिकारीहरु, लियो क्लब अफ जनकपुरधाम क्यापिटलका पदाधिकारी,पूर्वअध्यक्ष तथा विभिन्न सदस्यहरूको उपस्थिति रहेको थियो।