गिरिजानन्द साह/धनुषा/जेठ २६ गते। साथसाथ सिकाई सञ्जाल परियोजनाअन्तर्गत आयोजित सामाजिक परीक्षण (Social Audit) कार्यक्रम जनकपुरधाममा सम्पन्न भएको छ। शान्तिका लागि साझा अभियान (COCAP) को सहयोग तथा साथसाथ सिकाई सञ्जाल धनुषाको आयोजनामा सम्पन्न कार्यक्रमले परियोजनाको प्रभावकारिता, पारदर्शिता तथा जवाफदेहिताको समीक्षा गरेको छ।
कार्यक्रम साथसाथ सिकाई सञ्जाल धनुषाकी अध्यक्ष रिंकु कुमारी साहको अध्यक्षतामा सम्पन्न भएको हो भने जनकपुरधाम उपमहानगरपालिकाका उपमेयर किशोरी साह प्रमुख अतिथिका रूपमा सहभागी हुनुभएको थियो।
कार्यक्रमको सुरुवातमा पवित्रा कार्कीले शान्तिका लागि साझा अभियान (COCAP) को संस्थागत परिचय प्रस्तुत गर्दै संस्थाले नेपालमा शान्ति, मानवअधिकार, लोकतन्त्र तथा सामाजिक न्यायका क्षेत्रमा काम गर्दै आएको जानकारी गराउनुभयो। उहाँले विशेषगरी महिला मानवअधिकार रक्षकहरूको क्षमता अभिवृद्धि, संरक्षण, नेतृत्व विकास तथा सञ्जालीकरणमा संस्थाले महत्वपूर्ण भूमिका निर्वाह गरिरहेको बताउनुभयो।
त्यसैगरी गीता अधिकारीले परियोजनाको उद्देश्य, कार्यान्वयन प्रक्रिया, उपलब्धि, चुनौती तथा वित्तीय तथा संस्थागत पक्षहरूबारे विस्तृत प्रस्तुतीकरण दिनुभयो। उहाँले प्रस्तुतीकरणमार्फत “साथसाथ सिकाई : मानवअधिकारको रक्षा र मानवअधिकार रक्षकहरूको संरक्षण” परियोजनाले मधेश प्रदेशका महिला मानवअधिकार रक्षकहरूको क्षमता विकास, संरक्षण संयन्त्रको सुदृढीकरण तथा नेटवर्क विस्तारमा सकारात्मक प्रभाव पारेको जानकारी दिनुभयो।
प्रस्तुतीकरणका क्रममा परियोजनाअन्तर्गत सञ्चालन गरिएका विभिन्न गतिविधि, समुदायस्तरमा भएका हस्तक्षेप, सहभागीहरूको अनुभव तथा प्राप्त उपलब्धिहरूबारे समेत जानकारी गराइएको थियो। सहभागीहरूले परियोजनाले महिला तथा सीमान्तकृत समुदायका मानवअधिकार रक्षकहरूलाई सशक्त बनाउन सहयोग पुगेको धारणा व्यक्त गरेका थिए।
कार्यक्रममा बोल्दै प्रमुख अतिथि उपमेयर किशोरी साहले स्थानीय तह र नागरिक समाजबीचको सहकार्यलाई अझ प्रभावकारी बनाउन यस्ता सामाजिक परीक्षण कार्यक्रम उपयोगी हुने बताउनुभयो। उहाँले सामाजिक उत्तरदायित्व, पारदर्शिता तथा नागरिक सहभागिता सुनिश्चित गर्न सामाजिक परीक्षण महत्वपूर्ण माध्यम भएको उल्लेख गर्नुभयो।
सहभागीहरूले परियोजनाका उपलब्धिहरूको प्रशंसा गर्दै आगामी दिनमा महिला मानवअधिकार रक्षकहरूको सुरक्षा, क्षमता विकास तथा अधिकार प्रवर्द्धनका क्षेत्रमा थप प्रभावकारी कार्यक्रम सञ्चालन गर्न सुझाव दिएका थिए।
कार्यक्रमको अन्त्यमा अध्यक्ष रिंकु कुमारी शाहले सामाजिक परीक्षणमा प्राप्त सुझाव तथा सल्लाहलाई आगामी दिन गरिने कार्यलाई अझ प्रभावकारी बनाइने प्रतिबद्धता व्यक्त गरिन।
उक्त सामाजिक परीक्षण कार्यक्रमले परियोजनाको प्रगति, उपलब्धि तथा चुनौतीबारे सरोकारवालाहरूलाई जानकारी गराउनुका साथै पारदर्शिता, जवाफदेहिता र सहभागितामूलक विकासको अभ्यासलाई थप मजबुत बनाएको आयोजकले जनाएको छ।
सामाजिक परीक्षण कार्यक्रममा इन्सेक मधेश प्रदेशका राजु पासवान, फेडोका सिजेन्द्र सदा, विभिन्न सञ्चारकर्मी, संघसंस्थाका प्रतिनिधि, मानवअधिकारकर्मी तथा साथसाथ सिकाई सञ्जाल धनुषाका पदाधिकारीहरूको उल्लेख्य उपस्थिति रहेको थियो।
Discussion about this post