जानकी मन्दिरमा तुलसीदास स्वामी र स्मिता ठाकरेले गरे पूजा

धनुषा/जेठ ३ गते । भारतको वृन्दावनस्थित माँ तुलसी पीठका पीठाधीश तुलसीदास स्वामी र भारतको महाराष्ट्रका पूर्व मुख्यमन्त्री बालासाहेब ठाकरेकी बुहारी स्मिता ठाकरेले जनकपुरधामस्थित जानकी मन्दिरमा पूजा अराधना गरेका हुन् । पहिलोपटक जनकपुरधाम भ्रमणमा आएका दूबैले जानकी मन्दिरमा विशेष पूजा–आराधना गरे ।

दूबैलाई स्थानीय धार्मिक तथा सामाजिक अगुवाहरूले भव्य स्वागत गरेका थिए । मिथिलाको धार्मिक, सांस्कृतिक तथा ऐतिहासिक महत्वबारे जानकारी लिँदै उनीहरूले जानकी मन्दिरमा विधिपूर्वक पूजा–आराधना गरे ।
पूजापछि सञ्चारकर्मीसँग संक्षिप्त प्रतिक्रिया दिँदै तुलसीदास स्वामीले जनकपुरधामलाई माता जानकीको पवित्र जन्मभूमि तथा सम्पूर्ण हिन्दू आस्थाको केन्द्रका रूपमा वर्णन गरे । उनले नेपाल–भारतबीचको धार्मिक तथा सांस्कृतिक सम्बन्धलाई अझ सुदृढ बनाउन यस्ता आध्यात्मिक भ्रमणले महत्वपूर्ण भूमिका खेल्ने बताए ।

त्यस्तै स्मिता ठाकरेले जनकपुरधामको धार्मिक वातावरण, यहाँका नागरिकको आत्मीयता तथा जानकी मन्दिरको दिव्यताले आफू अत्यन्त प्रभावित भएको बताइन् । उनले पहिलो नेपाल भ्रमणलाई अविस्मरणीय अनुभवको रूपमा लिएको उल्लेख गर्दै पुनः जनकपुरधाम आउने इच्छा समेत व्यक्त गरिन् । उनले जनकपुरधामलाई बुझ्दै जाने र फिल्म पनि बनाउन आफू ईच्छुक रहेको बताए । दूबैले नेपाल भ्रमणको क्रममा पशुपतिनाथ, मुक्तिनाथ दर्शन गर्दै जनकपुरधाम आएर जानकी मन्दिर दर्शन पश्चात राम मन्दिर तथा राजदेवी मन्दिरमा समेत पूजा अर्चना गरे ।