गिरिजानन्द साह/धनुषा/जेठ ३ गते । विश्व उच्च रक्तचाप दिवसको अवसरमा जनकपुरधाममा प्रभातफेरि तथा निःशुल्क स्वास्थ्य शिविर कार्यक्रम सम्पन्न गरिएको छ । कार्यक्रम लायन्स क्लब अफ जनकपुरधाम, लायन्स क्लब अफ जनकपुरधाम गार्गी, लियो क्लब अफ जनकपुरधाम तथा लियो क्लब अफ जनकपुरधाम क्यापिटलको संयुक्त आयोजनामा सम्पन्न भएको हो ।
उच्च रक्तचाप सम्बन्धी जनचेतना अभिवृद्धि गर्ने उद्देश्यले आयोजित प्रभातफेरि प्रादेशिक अस्पताल जनकपुरधामबाट सुरु भई विभिन्न सडक परिक्रमा गर्दै जनकचोकमा पुगेर समापन गरिएको थियो । प्रभातफेरिपछि जनकचोकमा निःशुल्क स्वास्थ्य शिविर सञ्चालन गरिएको लियो क्लब अफ जनकपुरधाम क्यापिटलको अध्यक्ष विकाश साहले जनाएको छ ।
कार्यक्रममा लायन्स क्लब अफ जनकपुरधामका अध्यक्ष डा. राजेश साहले उच्च रक्तचाप नियन्त्रणका लागि सबै पक्षको साझा प्रयास आवश्यक रहेको बताए । उनले भने, “रक्तचाप नियन्त्रण केवल डाक्टरको प्रयासले मात्र सम्भव छैन, यसको लागि परिवार, समाज र सम्पूर्ण पक्षको साझा जिम्मेवारी आवश्यक छ।”
निःशुल्क स्वास्थ्य शिविरमा सहभागीहरूको ब्लड प्रेसर तथा ब्लड ग्लुकोज जाँच गरिएको थियो । शिविरमा स्थानीय सर्वसाधारणको सहभागिता रहेको डा. राजेश साहले बताएका छन् ।
कार्यक्रममार्फत उच्च रक्तचापजस्ता दीर्घरोगप्रति सचेतना फैलाउने, समयमै स्वास्थ्य परीक्षण गराउने तथा स्वस्थ जीवनशैली अपनाउन प्रेरित गर्ने उद्देश्य राखिएको लायन्स क्लब अफ जनकपुरधामको अध्यक्ष डा. राजेश साहको भनाइ रहेको छ ।
Discussion about this post