कानून दिवसको अवसरमा उच्च अदालत जनकपुरद्वारा ‘न्यायिक महोत्सव’ आयोजना गरिने

धनुषा/बैशाख २५ गते । उच्च अदालत जनकपुरले कानून दिवसको अवसरमा वैशाख २६ गते ‘न्यायिक महोत्सव’ आयोजना गर्ने भएको छ । कानून, न्याय र न्यायिक प्रक्रियाबारे सर्वसाधारणमा जनचेतना अभिवृद्धि गर्ने उद्देश्यले विभिन्न कार्यक्रमसहित महोत्सव आयोजना गर्न लागिएको अदालतले जनाएको छ ।

उच्च अदालत जनकपुरका कायम मुकाय मुख्यन्यायाधीश टेकनारायण कुँवरका अनुसार महोत्सवमार्फत अदालतको न्याय सम्पादन प्रक्रिया, प्रहरी अनुसन्धानको कार्यविधि तथा सरकारी वकिल कार्यालयले मुद्दा कसरी अगाडि बढाउँछ भन्ने विषयमा नागरिकलाई जानकारी गराइनेछ ।

महोत्सवअन्तर्गत बिहान ७ बजे अदालत परिसरबाट प्रभातफेरी कार्यक्रम निकालिनेछ । त्यसपछि औपचारिक कार्यक्रम आयोजना गरिने अदालतले जनाएको छ ।

कार्यक्रममा न्यायाधीश र कानून अध्ययनरत विद्यार्थीबीच अन्तरक्रिया, स्थानीय न्यायिक समिति, अदालत तथा बार–बेन्चबीच छलफल र अनुभव आदानप्रदानका कार्यक्रम पनि समावेश गरिएका छन् ।
महोत्सवमा सरोकारवाला निकाय, कानून व्यवसायी, विद्यार्थी तथा सर्वसाधारणको उल्लेखनीय सहभागिता रहने अपेक्षा गरिएको अदालतले जनाएको छ ।