जनकपुरधाममा ६ दिने बेसिक ग्राफिक्स डिजाइनिङ तालिम सुरु

धनुषा/चैत १ गते । जनकपुरधाममा ६ दिने बेसिक ग्राफिक्स डिजाइनिङ सम्बन्धी तालिम सुरु भएको छ। युवाहरूको डिजिटल सीप अभिवृद्धि गर्ने उद्देश्यले डाइनामिक पब्लिक लाइब्रेरी जनकपुरधामको आयोजनामा तथा लियो क्लब अफ जनकपुरधाम क्यापिटल र राजर्षी जनक विश्वविद्यालयको समन्वयमा तालिम कार्यक्रम सुरु गरिएको हो।

आयोजकका अनुसार तालिम चैत २ गतेदेखि ७ गतेसम्म राजर्षी जनक विश्वविद्यालय अन्तर्गतको कलेजमा सञ्चालन हुने छ। तालिममा सहभागी युवाहरूलाई ग्राफिक्स डिजाइनिङको आधारभूत ज्ञान, डिजाइनका सिद्धान्त, पोस्टर डिजाइन तथा विभिन्न डिजिटल सामग्री निर्माणसम्बन्धी व्यवहारिक प्रशिक्षण प्रदान गरिनेछ।

तालिम उद्घाटन सत्रका प्रमुख अतिथि क्याम्पस प्रमुख डा. सन्तोष कुमार कर्ण रहेका थिए। कार्यक्रममा डाइनामिक पब्लिक लाइब्रेरी जनकपुरधामका अध्यक्ष मनोज साहको अध्यक्षता रहेको थियो। त्यसैगरी विशिष्ट अतिथिका रूपमा डाइनामिक पब्लिक लाइब्रेरी जनकपुरधामका ट्रेनिङ डाइरेक्टर तथा लियो क्लब अफ जनकपुरधाम क्यापिटलको अध्यक्ष विकास साहको उपस्थिति रहेको थियो।

कार्यक्रममा डाइनामिक पब्लिक लाइब्रेरी जनकपुरधामका अध्यक्ष मनोज साह बोल्दै वक्ताहरूले वर्तमान डिजिटल युगमा ग्राफिक्स डिजाइनिङको महत्व बढ्दै गएको उल्लेख गर्दै यस्ता तालिमले युवाहरूलाई सीपयुक्त बनाउनुका साथै रोजगारी र स्वरोजगारका अवसरसमेत सिर्जना गर्न सहयोग पुग्ने बताएका थिए।

तालिममा प्रशिक्षकका रूपमा अनुराग साह र आयुष कर्णले सहभागीहरूलाई व्यवहारिक अभ्याससहित प्रशिक्षण प्रदान गरिरहेका छन्। कार्यक्रममा सहभागी युवा तथा विद्यार्थीहरूले उत्साहजनक सहभागिता जनाएका छन्।

यस अवसरमा डाइनामिक पब्लिक लाइब्रेरी जनकपुरधामका अध्यक्ष मनोज साहले तालिममा उत्कृष्ट प्रदर्शन गर्दै प्रथम स्थान हासिल गर्ने सहभागीलाई विशेष पुरस्कार प्रदान गरिने घोषणा समेत गरेका छन्। आयोजकका अनुसार यस्तो तालिममार्फत युवाहरूको डिजिटल क्षमताको विकास गरी समाजमा सकारात्मक योगदान दिन सक्ने दक्ष जनशक्ति तयार गर्ने लक्ष्य राखिएको छ।