जनकपुरधाममा “वडा क्रिकेट कप २०८२” आयोजना हुने

धनुषा/फागुन २९ गते । जनकपुरधाममा खेलकुदको विकास तथा युवाहरूबीच आपसी सद्भाव अभिवृद्धि गर्ने उद्देश्यले “वडा क्रिकेट कप २०८२” आयोजना हुने भएको छ।

जनकपुरधाम उपमहानगरपालिका वडा नं. १० को विशेष सहयोगमा आगामी २०८२ चैत १२ गते ऐतिहासिक बारहबीघा रंगभूमि मैदानमा उक्त प्रतियोगिता सञ्चालन हुने जानकारी प्रतियोगिताका संयोजक प्रशान्त अरविन्दले दिएका छन्।
संयोजक प्रशान्तका अनुसार प्रतियोगितामा जनकपुरधाम उपमहानगरपालिकाका २५ वटै वडाका क्रिकेट टोलीहरू सहभागी हुनेछन्।

प्रतियोगिता नकआउट (Knockout) प्रणालीमा खेलाइनेछ भने खेलमा सेतो लेदर बल (White Leather Ball) प्रयोग गरिनेछ। खेलाडीहरूले सेतो बाहेक अन्य रङ्गका रङ्गीन खेल पोशाक लगाउनुपर्नेछ।
सेतो लेदर बल प्रयोग हुने भएकाले सेतो प्याड प्रयोग गर्न पूर्ण रूपमा निषेध गरिएको छ। खेलाडीहरूले रङ्गीन प्याड वा प्याड कभर प्रयोग गर्नुपर्ने व्यवस्था गरिएको संयोजक प्रशान्तले बताए।

प्रतियोगितामा सहभागी हुने खेलाडीहरू आफ्नो वडाकै बासिन्दा हुनुपर्नेछ। प्रत्येक खेलाडीले नागरिकता वा जन्मदर्ता प्रमाणपत्र आयोजकलाई उपलब्ध गराउनुपर्नेछ भने बसाइँसराइ गरेर आएका खेलाडीले बसाइँसराइ प्रमाणपत्र अनिवार्य रूपमा पेश गर्नुपर्नेछ।

यदि अन्य ठाउँका खेलाडी समावेश गरेको प्रमाणित भएमा सम्बन्धित टोलीलाई प्रतियोगिताबाट तत्काल निष्कासन (Disqualified) गरिने संयोजक प्रशान्तले स्पष्ट पारेका छन्। साथै खेलका अन्य नियमहरू अन्तर्राष्ट्रिय क्रिकेट परिषद् (ICC) का प्रचलित नियमअनुसार लागू गरिनेछ।

उक्त प्रतियोगितामा सहभागिता शुल्क निःशुल्क राखिएको छ भने खेलाडीहरूको ड्रेस जनकपुरधाम उपमहानगरपालिकाले उपलब्ध गराउने व्यवस्था गरिएको संयोजक अरविन्दले जानकारी दिएका छन्।
प्रतियोगितालाई सफल बनाउन सबै वडाका उत्कृष्ट टोलीलाई सहभागिता जनाउन आयोजकले अनुरोध गरेको छ।
थप जानकारीका लागि
संयोजक: प्रशान्त अरविन्द (९८०४८०५१५५)
सँग सम्पर्क गर्न सकिने जनाइएको छ।