जनकपुरधामलाई हरियाली र स्वच्छ बनाउने लक्ष्य सहित जउवा संघको अभियान,पसल–पसलमा गमला र बिरुवा वितरण

जनकपुरधाम/माघ ११ गते। जनकपुरधाम उद्योग वाणिज्य संघले नगरलाई सफा, स्वच्छ र हरियालीयुक्त बनाउने उद्देश्यसहित ‘क्लिन जनकपुरधाम, ग्रीन जनकपुरधाम’ अभियान सञ्चालन गर्दै शहरका विभिन्न पसलहरूमा गमला तथा बिरुवा वितरण गरेको छ।

पर्यटकको चाप बढी हुने क्षेत्रलाई लक्षित गर्दै संघले व्यापारिक प्रतिष्ठानहरूमा प्रत्यक्ष सम्पर्क गरी गमला र बिरुवा वितरण गरेको हो। अभियानअन्तर्गत जानकी मन्दिरदेखि जनक चोक, जानकी मन्दिरदेखि महावीर चोक तथा जानकी मन्दिरदेखि रामानन्द चोकसम्मका पसलहरूमा बिरुवा तथा गमला वितरण गरिएको जनकपुरधाम उद्योग वाणिज्य संघका अध्यक्ष सुरेन्द्र भण्डारीले जानकारी दिए।

अध्यक्ष भण्डारीले जनकपुरधाम आउने आन्तरिक तथा बाह्य पर्यटकहरूले शहरको सफाइ र सौन्दर्यको प्रशंसा गरुन् भन्ने संघको मुख्य लक्ष्य रहेको बताए। नगरलाई आकर्षक, हरियाली र व्यवस्थित बनाउन व्यापारीहरूको सक्रिय सहभागितामा अभियान सञ्चालन गरिएको उनको भनाइ छ।

बिरुवा तथा गमला वितरण कार्यक्रम जनकपुरधाम उद्योग वाणिज्य संघ, प्राइम बैंक जनकपुरधाम शाखा, कपडा तथा रेडिमेड व्यवसायी संघ तथा जनकपुरधाम उपमहानगरपालिकाको संयुक्त आयोजनामा सम्पन्न भएको हो।

कार्यक्रममा प्राइम बैंकले आफ्नो सामाजिक उत्तरदायित्वअन्तर्गत एक हजार वटा बिरुवा वितरण गरेको प्राइम बैंक जनकपुरधाम शाखाका प्रमुख शुभम साहले जानकारी दिए। उनले वातावरण संरक्षण र नगरको सौन्दर्य प्रवर्द्धनमा बैंकले निरन्तर सहयोग गर्दै आएको पनि बताए।