जनकपुरधाम/पुस १३ गते। नेपालको लोकप्रिय डिजिटल वालेट तथा अनलाइन भुक्तानी प्लेटफर्म ईसेवाले जीवन विकास लघुवित्त वित्तीय संस्था लिमिटेड, शाखा कार्यालय जनकपुरसँग आबद्ध १५० जना सदस्यहरूलाई वित्तीय साक्षरता सम्बन्धी तालिम प्रदान गरेको छ।
डिजिटल भुक्तानी प्रणालीको प्रयोग तीव्र रूपमा बढ्दै गइरहेको सन्दर्भमा आयोजना गरिएको उक्त तालिममा सहभागीहरूलाई वित्तीय शिक्षा, डिजिटल कारोबारको महत्व, अनलाइन भुक्तानी प्रणालीको सुरक्षित प्रयोग, डिजिटल माध्यमबाट हुने कारोबारका फाइदा तथा सम्भावित जोखिमहरूका बारेमा जानकारी दिइएको थियो। साथै, डिजिटल ठगी, गलत लिंक, पासवर्ड सुरक्षाजस्ता जोखिमहरूलाई कसरी कम गर्न सकिन्छ भन्ने विषयमा व्यवहारिक उदाहरणसहित प्रशिक्षण प्रदान गरिएको थियो।
तालिममा विशेषगरी लघुवित्त संस्थासँग आबद्ध सदस्यहरूलाई डिजिटल माध्यममार्फत सुरक्षित, सहज र पारदर्शी रूपमा आर्थिक कारोबार गर्न सक्षम बनाउने उद्देश्य राखिएको थियो। प्रशिक्षकहरूले मोबाइल वालेटको सही प्रयोग, व्यक्तिगत विवरणको गोपनीयता, सुरक्षित पिन तथा पासवर्डको प्रयोग र शंकास्पद गतिविधिबाट सतर्क रहने उपायहरूबारे समेत स्पष्ट पारेका थिए।
कार्यक्रमको सञ्चालन ईसेवाको शाखा कार्यालय जनकपुरधामले गरेको हो भने कार्यक्रमको आयोजना तथा व्यवस्थापन जीवन विकास लघुवित्त वित्तीय संस्थाको शाखा कार्यालय जनकपुरले गरेको थियो। आयोजकका अनुसार यस किसिमका तालिमहरूले लघुवित्त क्षेत्रका सदस्यहरूलाई डिजिटल रूपमा सशक्त बनाउँदै वित्तीय पहुँच र समावेशितामा महत्वपूर्ण योगदान पुर्याउने अपेक्षा गरिएको छ।
डिजिटल प्रविधिको प्रयोगलाई सुरक्षित र जिम्मेवार बनाउन यस्ता वित्तीय साक्षरता कार्यक्रमहरू आगामी दिनमा पनि निरन्तर रूपमा सञ्चालन गरिने ईसेवाले जनाएको छ।
Discussion about this post