गिरिजानन्द साह/जनकपुरधाम/पुस ९ गते। जनकपुरधाममा नीति निर्माणदेखि कार्यान्वयन तहसम्म युवाको सहभागिता विषयक युवा सहभागिता संवाद कार्यक्रम सम्पन्न भएको छ। युएनएफपीए (UNFPA), राष्ट्रिय युवा परिषदको मधेस प्रदेश युवा सञ्जाल तथा खेलकुद तथा समाज कल्याण मन्त्रालय मधेस प्रदेशको सहकार्यमा कार्यक्रम आयोजना गरिएको हो।
कार्यक्रममा वक्ताहरूले आज पनि देशमा युवाको प्रभावकारी उपस्थिति न्यून हुँदै गएको र अधिकांश युवा रोजगारी तथा अध्ययनका लागि विदेश पलायन भइरहेको अवस्थाप्रति चिन्ता व्यक्त गरे। संघ, प्रदेश तथा स्थानीय सरकारले युवालाई नीति निर्माणदेखि कार्यान्वयनसम्म सक्रिय रूपमा सहभागी गराउने वातावरण बनाउनुपर्नेमा जोड दिइयो।
वक्ताहरूले युवाले आफ्ना लागि बनेका नीति तथा कार्यक्रमबारे जानकारी लिनुका साथै ती नीतिहरू कत्तिको कार्यान्वयनमा छन् भन्ने विषयमा निगरानी र सवाल उठाउनुपर्ने आवश्यकता औंल्याए। युवाको सहभागिताबिना समावेशी र दिगो विकास सम्भव नहुने उनीहरूको भनाइ थियो।
कार्यक्रमकी प्रमुख अतिथि संविधानसभा सदस्य तथा NFPPD की संस्थापक अध्यक्ष माननीय महालक्ष्मी उपाध्यायले नीति निर्माण प्रक्रियामा युवाको भूमिका सशक्त बनाउन राज्यले स्पष्ट योजना र लगानी गर्नुपर्ने बताउनुभयो। कार्यक्रमको अध्यक्षता खेलकुद तथा समाज कल्याण मन्त्रालय मधेस प्रदेशका उपसचिव धर्मेन्द्र लाल कर्णले गर्नुभएको थियो।
कार्यक्रममा जनसंख्या तथा विकासका लागि सांसदहरूका अध्यक्ष योगेन्द्र चौधरी, संविधानसभा सदस्य मिनाक्षी झा, राष्ट्रिय युवा परिषदका प्रशासकीय प्रमुख पर्शुराम कार्की, विज्ञ डा. दिपेश घिमिरे, UNFPA का प्रदेश प्रमुख नरेन्द्र मिश्र, प्रदेश युवा सञ्जालका अध्यक्ष नयुम राईन तथा नेपाल पत्रकार महासंघ मधेस प्रदेशका महासचिव शैलेन्द्र महतोले आ–आफ्ना धारणा राख्नुभएको थियो।
कार्यक्रमको सञ्चालन मधेस आदिवासी अपाङ्ग महिला संघ (MIDWAN) की अध्यक्ष दिपिका लामाले गर्नुभएको थियो। संवाद कार्यक्रममा विभिन्न संघ–संस्थाका प्रतिनिधि, युवा, पत्रकार तथा सरोकारवालाको उल्लेख्य उपस्थिति रहेको थियो।
Discussion about this post