निजी अस्पतालमा श्रमशोषणविरुद्ध ८ सुत्रीय मागसहित मधेश प्रदेशका स्वास्थ्यकर्मीहरूको आन्दोलन घोषणा

जनकपुरधाम/असोज २७ गते । मधेश प्रदेशभरका स्वास्थ्यकर्मीहरूले निजी स्वास्थ्य संस्थाहरूमा भइरहेको श्रमशोषण र दमनको अन्त्यको माग गर्दै आन्दोलनमा उत्रिने घोषणा गरेका छन् । उनीहरूले ८ सुत्रीय मागसहित आगामी कात्तिक १६ गतेदेखि शान्तिपूर्ण आन्दोलन सुरु गर्ने चेतावनी दिएका हुन् ।

धनुषा जिल्लास्थित विभिन्न निजी अस्पताल र स्वास्थ्य संस्थामा कार्यरत स्वास्थ्यकर्मीहरूले आज जनकपुरधाममा पत्रकार सम्मेलन गरी लामो समयदेखि न्यून तलब, असमान व्यवहार र असुरक्षित वातावरणमा काम गर्न बाध्य भएको गुनासो गर्दै आन्दोलनको घोषणा गरेका हुन् ।

स्वास्थ्यकर्मीहरूले नेपाल सरकारको कानुनअनुसार तलब स्केल लागू गर्नुपर्ने, सरकारी स्वास्थ्य संस्थाका करारकर्मीलाई हटाई लोक सेवा आयोगमार्फत पदपूर्ति गर्नुपर्ने, स्वास्थ्यकर्मीहरूको बीमा तथा सुरक्षा सुनिश्चित गर्नुपर्ने र हप्तामा अधिकतम ४२ घण्टाभन्दा बढी काम गर्न नपर्ने व्यवस्था गर्नुपर्ने माग गरेका छन् ।

त्यस्तै, स्वास्थ्यकर्मीका परिवारलाई निःशुल्क उपचारको सुविधा, निजी अस्पतालमा बिदा र भत्ताको व्यवस्था, हरेक वर्ष १० प्रतिशत तलब वृद्धि र निजी तथा सरकारी अस्पतालमा समान विज्ञापन प्रणाली लागू गर्नुपर्ने माग पनि उनीहरूले अघि सारेका छन् ।

पत्रकार सम्मेलनमा स्वास्थ्यकर्मीहरूले मन्त्रालय र सम्बन्धित निकायले पटक–पटक सूचना जारी गरे पनि निजी अस्पतालहरूले कार्यान्वयन नगरेकाले मनोबलमा गम्भीर असर परेको बताएका छन् ।

जिल्ला प्रशासन कार्यालय, श्रम मन्त्रालय, मुख्यमन्त्री कार्यालय र स्वास्थ्य मन्त्रालयमा ध्यानाकर्षण गराए पनि कुनै ठोस पहल नभएको गुनासो गर्दै स्वास्थ्यकर्मी नरेश अधिकारीले माग पूरा नभए कात्तिक १६ गते आइतबारदेखि सम्पूर्ण अस्पतालहरू खाली गरी शान्तिपूर्ण आन्दोलन सुरु गर्ने चेतावनी दिएका छन् ।

आन्दोलनका कारण बिरामी सेवामा समस्या आएमा यसको सम्पूर्ण जिम्मेवारी अस्पताल सञ्चालक र सम्बन्धित मन्त्रालयले लिनुपर्ने स्वास्थ्यकर्मीहरूको भनाइ छ ।