मारवाडी मञ्चद्वारा बोलबम भक्तजनका लागि जनकपुर र ढल्केवरमा स्वास्थ्य शिबिर सञ्चालन

जनकपुरधाम/साउन ५ गते। साउन महिनामा सोमबारी मनाउँदै बोलबम यात्रा गर्ने भक्तजनका सुविधालाई ध्यानमा राख्दै मारवाडी युवा मञ्च जनकपुरले जनकपुर र ढल्केवरमा स्वास्थ्य शिबिरको आयोजना गरेको छ।

धार्मिक आस्थासँगै जनसेवा पनि आवश्यक भन्ने भावनाका साथ मञ्चले जनकपुरधाम र ढल्केवरमा स्वास्थ्य शिबिर सञ्चालन गर्नुका साथै जुस, सर्वत र शुद्ध खानेपानी वितरण गरेको हो।

मञ्चका कार्यक्रम संयोजक विकास गोयलका अनुसार आइतबार साँझ धनुषा जिल्लाको ढल्केवरस्थित टुटेश्वर महादेव मन्दिरतर्फ यात्रा गर्ने बोलबम भक्तजनलाई लक्षित गरी स्वास्थ्य शिबिरको आयोजना गरिएको थियो। यात्राको क्रममा थकाइ, निर्जलीकरण, चिप्लोपनजस्ता समस्या भोग्ने भक्तजनलाई प्राथमिक उपचार तथा स्वास्थ्य परामर्श उपलब्ध गराइएको उनले जानकारी दिए।

त्यसैगरी, सोमबार जनकपुरधामको प्रसिद्ध कपिलेश्वर महादेव मन्दिर पुग्ने भक्तजनका लागि समेत स्वास्थ्य शिबिर सञ्चालन गरिनुका साथै जुस, सर्वत र पिउने पानी वितरण गरिएको गोयलले बताए।

मारवाडी युवा मञ्च जनकपुरका अध्यक्ष राहुल सिंघानियाका अनुसार ढल्केवर र जनकपुर दुबै स्थानमा सयौं धर्मालम्बीले उक्त सेवाबाट प्रत्यक्ष लाभ उठाएका छन्। “साउन महिनामा भक्तजनको भीड अत्यधिक हुने भएकाले उनीहरूको स्वास्थ्य र सुरक्षालाई ध्यानमा राखी यस्तो कार्यक्रम गरिएको हो,” सिंघानियाले बताए। उनले आगामी सोमबारहरूमा पनि यस्तै सेवा निरन्तर जारी राख्ने जानकारी दिँदै जनताको सेवा गर्न पाउँदा मञ्चलाई गर्व लागेको धारणा व्यक्त गरे।

मारवाडी युवा मञ्च जनकपुरले विगत केही वर्षदेखि धार्मिक अवसरमा स्वेच्छिक रक्तदान, स्वास्थ्य जाँच, खानेपानी तथा फलफूल वितरणजस्ता कार्य गर्दै आइरहेको छ। यस वर्षको सोमबारी अवसरमा सञ्चालन गरिएको सेवा कार्यक्रम मञ्चको सामाजिक उत्तरदायित्वअन्तर्गतको एक सशक्त उदाहरणका रूपमा देखिएको छ।

स्थानीय प्रशासन र सर्वसाधारणले पनि मञ्चको यो पहललाई सकारात्मक रूपमा लिएका छन्।