१८ औँ गणतन्त्र दिवसको अवसरमा कायापलट द्वारा “विद्याश्रम बहस” सम्पन्न, सुशासन र पारदर्शिता विषयमा छलफल

गिरिजानन्द साह/जनकपुरधाम/जेठ १५ गते। गणतन्त्र दिवसको १८ औँ वार्षिकोत्सवको अवसरमा कायापलटको आयाेजनामा, International Alert र Accountability Lab Nepal सँगको सहकार्य तथा European Union in Nepal को आर्थिक तथा प्राविधिक सहयाेगमा “विद्याश्रम बहस” कार्यक्रम जनकपुरधाममा भव्य रूपमा सम्पन्न भएको छ।

उक्त कार्यक्रमको अध्यक्षता कायापलट संस्थाका कोषाध्यक्ष बलराम साहले गरेका थिए। कार्यक्रममा “गणतन्त्रमा सुशासन र पारदर्शिता: सपना कि सत्यता?” भन्ने विषयमा केन्द्रित बहस तथा विचार विमर्श गरिएको थियो। बहसका प्रमुख वक्ताको रूपमा परिचित सामाजिक अभियन्ता जीवन पुडासैनीले विषयमा आफ्नो धारणा राख्दै लोकतान्त्रिक व्यवस्थामा पारदर्शिता र जवाफदेहिताको भूमिका, वर्तमान चुनौतीहरू तथा युवाहरूको भूमिकामाथि प्रकाश पारे।

वक्ता पुडासैनीले गणतन्त्र केवल राजनीतिक परिवर्तनमा सीमित नभई जनताको जीवनमा अनुभूत हुने परिवर्तनका माध्यमका रूपमा स्थापना हुनुपर्नेमा जोड दिए। उनले सुशासन र पारदर्शिता कायम राख्न नागरिक सचेतना, संस्थागत उत्तरदायित्व र युवाहरूको सक्रिय सहभागिता अपरिहार्य रहेको बताए।

कार्यक्रममा धनुषा जिल्लाका विभिन्न शैक्षिक संस्थाबाट आएका दर्जनौं विद्यार्थीहरू सक्रिय रूपमा सहभागी थिए। विद्यार्थीहरूले बहसको क्रममा आफ्ना धारणा प्रस्तुत गर्दै प्रश्नहरू उठाएका थिए, जसले कार्यक्रमलाई अझ सजीव र विचारोत्तेजक बनाएको थियो। सहभागीहरूले गणतन्त्र दिवसको सन्दर्भमा यस किसिमको बहस कार्यक्रमले आफूहरूलाई लोकतन्त्रप्रति अझ गहिरो सोच र उत्तरदायित्वबोध दिलाएको प्रतिक्रिया दिएका थिए।

कायापलट संस्थाले “विद्याश्रम बहस” शृंखला अन्तर्गत युवाहरूको अभिमत, चासो र नेतृत्व क्षमताको विकास गर्ने उद्देश्यले यस्ता कार्यक्रमहरू निरन्तर गर्दै आएको जनाएको छ। आयोजक संस्थाका अध्यक्ष बलराम साहले धन्यवाद मन्तव्यमा युवाहरूको सहभागिता र कार्यक्रमलाई सफल बनाउन साथ दिने सबै साझेदार संस्था तथा सहभागीहरूप्रति आभार प्रकट गरे।

कार्यक्रमले लोकतन्त्र, सुशासन र पारदर्शिताको विषयमा युवावर्गमा जनचेतना अभिवृद्धि गराउने विश्वास आयोजकले लिएका छन्।