भुमिका बिष्ट । धनुषा जिल्ला मिथिला नगरपालिका वडा नं. ६ ढल्केवर स्थायी घर भएकी सुनिता खड्काको आर्थिक अवस्था निकै नाजुक थियो । सामान्य खेतीपातीमा निर्भर उनको परीवारलाई खेतीपातीबाट मुस्किलले ७/८ महिना मात्रै छाक टार्न पुग्थ्यो। घर खर्च चलाउन पनि धौ धौ हुँदा सुनिताको परिवारलाई समान्य कर्जा पनि पहाड उठाउनु झैं थियो ।
आर्थिक अभावले सताईरहेकै बेला सुनिता २०७४ माघ २५ गते महिला अधिकार तथा विकास केन्द्रमा सहभागी भईन् । उनले त्यहाँ मासिक तिन सय रुपैयाँ बचत गर्नु पर्ने हुन्थ्यो । उनि उक्त संस्थामा सहभागी भएपछि बचतको लागि श्रीमानलाई भन्नु पर्ने हुन्थ्यो । बचतको लागि पनि यसरी श्रीमानलाई भनिरहँदा सुनितालाई निकै नमज्जा लाग्थ्यो ।
वि. सं २०७५ सालमा सुनिताले आफै केही गर्ने सोच बनाईन् । त्यसपछि उनले संस्थाबाट २० हजार रुपैयाँ कर्जा लिई किराना पसल संचालनमा ल्याईन् । किराना पसलका साथै उनले २०७५ सालमा नै डेरी पनि संचालन गर्ने सोचिन जसका लागि उनले संस्थाबाट ५० हजार रुपैयाँ कर्जा लिईन् । उनको व्यवसाय निकै फस्टायो । सुनिताले आफना २ जना छोरालाई निजी स्कुलमा पढाइरहेकी छिन्। उनी अहिले दुध संकलन गरी बिक्रि गरिरहेकी छिन् ।
उनि अहिले मासिक ३० देखी ३५ हजारसम्मको आम्दानी गर्ने भएकी छिन् । आफ्नै कमाईले उनले आफना छोराहरुलाई राम्रो शिक्षा पनि दिईरहेकी छिन् भने पहिलेभन्दा अहिले उनको आर्थिक अवस्थामा पनि निकै सुधार आइसकेको छ । उनले आफनै कमाईबाट ढल्केवरमा १० धुर घडेरी पनि किनेको बताईन् । वित्तीय संस्थामा शुरुमा ३०० रुपैयावाट शुरु गरेको वचत आज रु ३७ हजार माथि रहेको छ । महिला लघुवित्त वित्तीय संस्थाबाट लिएको कर्जाले सुरु गरेको व्यवसायवाट आफू आत्मनिर्भर भएको देखेर सुनिताका गाउँका अन्य दिदी बहिनीहरुले पनि आ।आफ्नो व्यवसाय गर्न थालेका छन् । सुनिता अहिले उनीहरुलाई पनि हौसला दिइरहेकी छिन् ।
सुनिताले ठूलो संघर्षका साथ १० जना दिदि बहिनी जम्मा गरि केन्द्र गठन गरेको अनुभव पनि सुनाईन । उक्त समूहले सामुहिक जमानीमा कर्जा लिई व्यवसाय सफल गर्न सकिंदैन कि भन्ने डर पनि उनमा रहेको थियो । अन्य सदस्य दिदी बहिनीले कर्जा दुरुपयोग गरी अहिले अप्ठ्यारोमा परेको र ति दिदीबहिनीहरुलाई कर्जाको दुरुपयोग नगर्न सधै सल्लाह दिदै आएको सुनिताले बताईन् ।
सुनिता खड्काले आफूले अप्ठ्यारो पर्दा पनि हतोत्साहित नभइकन समूह केन्द्रलाई निरन्तरता दिदै समस्या समाधान गर्न सफल भईन् । सफल व्यवसायी वन्ने अठोट लिईरहेकै वेला विचमा कोरोनाको लकडाउनले व्यवसायमा केहि प्रभाव परेको तर फेरि विस्तारै सफल बन्ने अठोटले आफ्नो काममा निरन्तरता दिईरहेको र फलस्वरुप अहिले आत्मनिर्भर भएकी छिन् ।-अर्थ संसार बाट
Discussion about this post